90 pisporî do beşdarê komxebate bibî

LEZGÎN AKDENÎZ / MA / AMED

Çend rojî verê vera polîtîkayanê asîmîlasyonî de xeylê partîyanê kurdan ra temsîlkarî ameybî têhet û kombîyayîşêk viraştbî û Platformê Ziwanê Kurdî awan kerdbî. Platformî bi waştişê wa Kurdî bibo ziwanê perwerdeyî û ziwano fermî, kampanya dîyabi destpêkerdene.

Çarçewaya kampanya de do 10 û 11ê teşrîna peyêne de komxebatêk bêro viraştene. Serekê Partîya Sosyalîzm û Azadîye (OSP) Sînan Çîftyurekî derheqê komxebate de malumatî dayî. Çîftyurekî va ‘nizdîyê 90 pisporê ziwanî do beşdarê komxebate bibî’ û wina dewam kerd: “Ma do planê ke bêrî viraştene ser o munaqeşe bikerî. Bi no qeyde do bingeyêk bêro ronayene û netîceyo ke bivejîyo, do bierzîyo pratîkî.”

Çiftyurekî dîyar kerd ke hedefê înan o sifteyîn fermîbîyayîşê ziwanî yo û wina va: “Ma do stratejîyêko 3 gaman ra pê yeno, taqîb bikerî. Gama sifteyîn de ma do hewl bidî seba ke ziwan bi hawayo fermî bêro qebul kerdene, bixebetyî. Gama dîyine de ma do dûştê hukmat û burokrasî de muracatan bikerî. Tewr peynî ma do babete bikirêşî rojeva Milletê Yewbîyayeyan (MY).”