Sakîne, Fîdan û Leyla. Hîre cuwanikê abdalî.

Hîre cuwanikê şoreşgerî.
Waxtoke vejayî raye, armancê xo verva bindestiye û zordariya dewleta terorîste pêrodayene bî. Weşiya xo de naye rê guman nêverda. Jê abdalan destê xo weşiya sexte ra onte.
Marê înan goynayene nêkuna. Ma şîkîme teyna înan rê heyran bîme. Înan goynayene karê hevalanê înan o. Egîdan goynayene onca karê abdalan o. Abdalê ke koyan ra yê, abdalê ke hepisxanan derê, abdalê ke sukan derê û abdalê ke destan derê.
Mayê ke teverayîme, weşiya abdalan çiqas famkeme û bare keme, no persode bîn o.
Ma weşiya înan tam bare nêkerde ke, înan bigoynîme. Sakîne, Fîdan û Leyla seweta ma zî
dapêro, bêbedel, mara tewa nêwast. Jûyê marê jû doseg bes nêno, hama 10 abdalî jû doseg de kunê ra, weşiya xo niya ramitenê. Destê xo mal û milkê dîna vêsayiye ra ont bî.
Heya, înan teyna teoriyê weşiya rind û rindeke nêvirast, jê ma tayîne. Înan teoriyê xo pratîk de ardenê ca. Her deqa xo, her sata xo seweta cematedê serbestî viyarnenê ra.
Jê ma tayîne, jê jû gule ranê bî û çond rojî ra tepiya nêpermelayî ro. Her tim kewe mendî jê merxî. Tarîxê mawo newe nî abdalan nusna. Eke ma ewro sareberzîme, keşî rê eyvallah nêkeme, sayiya nî abadalan dero. Heyraniya mi îta ra yena.
Qetilkaranê nî abdalan çiye hesav nêkerd. Ebi kistena nî hîre abdalan ma kêm nêbîme, bîme jede, bîme silxet. Parîs û Amed de nî abdalan ra xatir wastena 100hezaran nîsana na silxetiye biye. Cayê nî abdalan tarîxê ma de hebena bî miqerem. Zerya ma de cayê xo guret, vîra ma de manenê bêwaxt.
Heto jû ra zî aptalî estê ke qeyta tewa famnêkenê. Kamiya abdalanê ma sero spekulasyonan virazenê.
Nî aptalî kamiya Sakîne, Fîdane û yê Leyla yê aleviyenî oncenê ver. Halbike nî abdalî ne seweta aleviyenî, ne seweta sunniyenî, ne zî seweta jû dîn û mezhebê bînî kewtî raye. Nî abdalî verva faşîzmî seweta serbestiya qomê bindestî kewtî raye.
Kamo ke kamiya nî cuwanikan yê îtîqatî vezeno ver, niyetê ey zaf xiravin o. Ebi na vatîs nî aptalî qewxa nî hîre abdalan de bi rêz niyanêdanê. Wazenê onca fizilenî bikerê û ma jûvînî ra cera kerê.
Taye aptal zî kamiya Sakîne yê Zaza vezenê ver. Nî mordemê niyanen zî hora bê fam û bê îzan yê. Aptal ra aptal yê.
Çi beno bibo, aptalan hata nika qeyta abdalî famnêkerdê. Ma gune dîqqet bikerîme.
Abdalanê xorê wayîr vejîme! Sodirê ma înan dest dero!