Hurendîya Hemşaredarê Stewrê Mehmet Aydin Alokmen Îdrîs Koç zey qeyûm tayînî Şaredariya Stewrê bi. Hemşaredarê Agirî Sirri Sakik zî wezîfe ra ame girewten û hurendîya ci de walîyê sûk Mûsa Işin zey qeyûm ame tayînkerdiş. Hemşaredarê qezaya Şirnex Elkê Nûrettîn Ataman zî girotîya bin çiman.
Hikûmeta AKP bi tayînkerdişê qeyûman, şaredarîyanê DBP xesp kena. Heta nika 81 şaredarîyanê DBP rê qeyûm ame tayînkerdiş. Kişta nayî de 83 hemşaredarê DBP amey tepiştiş û erzîyay zîndanan. Xespkerdîş û tepiştişê hemşaredaranê DBP ramenê.
Qeymeqam tayîn bi
Hemşaredarê qezaya Mêrdîn Stewrê Mehmet Aydin Alokmen 25'ê Sibate de girotîya bin çiman. Bi nayî bingeyê xespî ame ronayen û vizêr qeymeqamê Stewrê Îdrîs Koç zey qeyûm tayînî şaredarîye ame kerdiş. Polîsê ke eştî şaredarî ser qerarê qeymeqamtî resna şaredariye. Polîsan herzewbîn alaya Tirkîye aliqnay balqonê şaredarî.
Hurendîya Sakik’î zî qeyûm
Heto bîn ra Hemşaredarê Agirî Sirri Sakik zî bi fermanê Wezîrê Karê Zerrîn wezîfe ra ame girewten. Hurendîya Sakik’î walîyê sûk Mûsa Işin zey qeyûm ame tayînkerdiş. Qerarî ra dima şaredarî hetê polîsan girotîya bin ablûqa.
Hemşaredara Agirî Mukades Kûbîlay zî 28ê Kanûne 2016’î ra na het tepiştî ya.
Hemşaredarê Elkê girotîya bin çiman
Hemşaredarê qezaya Şirnex Elkê Nûrettîn Ataman vizêr seatanê sodir de netîceyê sereştişê keyeyî de girotîya bin çiman. Binçim girewtişê Atamanî ra dima polîsan herzewbîn eştî şaredarîya Elkê ser zî û odeyê Atamanî de cigeyrayîşî kerdî.
Ataman’î ra pîya Cindî Ataman û Davût Ataman zî girotîya bin çiman.
MÊRDÎN / AGIRÎ / ŞIRNEX