Çend rojî verê dayîka Hetkara Hemserekîya Pêroyî ya HDPyî Aysel Tugluke, Hatun Tugluke wefat kerdbî û wextê definbîyayîşê cenazeya dayîke de grûbêka faşîste hêrişê cenazeye kerdbî. Nêyî ver kesê ke beşdarê cenaze bîbî, mecbûr mendbî ke cenazeye binê herre ra vejî û bîşêrî Dêrsim de defin bikerî.
Dima ra 2 rojî verê vejîyabî orte ke kesê ke hêrişê merasîmê cenazeye kerdbî û ameybî tepiştiş, înan ra Murat Alpî qereqol de Wezîrê Karê Zereyî Suleyman Soyluyî reyde fotograf anto. Herçiqas ke Soyluyî fotografan ver heqaretê çapemenîye û şarî kerd, reyna zî raştî nêbedilîyaye. Hedîse ra dima zaf hetan ra reaksîyonî ameyî/ yenî. 2 rojî yo ke tena Soylu nê, fotografê hêrişkaran bi Wezîra Xebate û Ewleyîye Julîde Sarierogluye û lajê Erdoganî Bîlal Erdoganî reyde zî vejîyayî orte.
Babete ser o Verfekê HDPyî Osman Baydemîrî qisey kerd û reaksîyon nîşan da.
Neke şima zî benî ortaxê nê guneyî
Baydemîrî derheqê hêrişî de va 'ma ameyî cayêko ke êdî vatiş qedîyayo' û wina dewam kerd: "Eke goristanê ma nêbî ortax, o wext çi beno ortax? Eke goristanê ma nêbî ortax, camî, cemxane û sewbîna çîyêkê ma zî nêbeno ortax. No tarîxê ma de çîyêko zaf muhîm o. Ez veng dana kurdê ke heta nika rayê xo dayî AKP; ganî şima destekê xo muhakeme bikerî, neke şima zî benî ortaxê sucî. Ma zî do rojêk rayîrê Dayîka Hatune de şêrî. Wexto ke aye roje ameye, ma do kerdişanê xo ver bêrî muhakemekerdiş.”
Heme çîyî îspat keno
Baydemîrî va 'ewro roja bêvengmendişî nîya; ewro vera faşîzmê îqtîdarî de vindetişî ya' û wina domna: "Fotografê ke vejîyayî orte, vatişanê ma raşt vejenî. Çimkî hêriş biorganîze û biplan bî. Ma wextê hêrişî de nêşîna qasê saetêk xo biresnî dezgeyanê fermîyan. Polîsê ke ewja de bî, leqmatêkî daxî nêdayî hêrişkaran ro. Wina kerdî ke ewja de hêrişkarî kom bibî. Fotografo ke vejîya orte, heme çî îspat keno."
Eke nêro girewtiş, do no proses dewam bikero
Baydemîrî qala îstîfa zî kerd û wina va: "Ganî aye roje heme kesê ke hêrişî ver çimê xo girewtî û bêveng mendî, îstîfa bikerî. Edeb û kulturêko winasî AKP de çin o. Ma nêşenî çîyêko çin o, biwazî. Şaşî reyde têrîmendiş û raştkerdiş, erdemêk o û ganî no her sîyasetmedar de bibo. AKP de profîlêko winasî yê sîyasetî çin o. Vengdayîşê rayapêroyî yê îstîfakerdişî, vengdayîşêko heqdar o. Berpirsîyarîya kamî esta, ganî wezîfe ra bêro girewtiş. Eke nêro girewtiş, do no proses dewam bikero.”
NAVENDA XEBERAN