AKP do bibo sey ANAP û DYP
Tu wext xêmî ey demokrasî nîbi ke, qabe dîktatorî emirbar bî, otewir mîsyona xo ard/ana bica. Qabe serektîya Erdogan rayir kena pak. Bi nameyê qanuna ewleyî, teklîfî wayer xo o peyîn ana bica.
Êdî ewro hendêk xo îhya kerda, tena bîya xo qedr û sermest. Hendêk sermest bîya, nî haye ey, ey esta, nî zî haye ey şar est a. Wezîr û verêfekî AKP Bulend Arinc hîrê roj verê yew beyaneti xo de îtîraf kerd. Vano “Se reyan ra pancas hemînê de ma tercîh bî. Feqet ewro pancas hemîna yên bîn verbi ma bi nefret pir bîyê”. Îna dewam keno. “Nîhayet malzemeyî ey merdim o, ez yew partî ra behs kena. Emanet, gêra ehlî xo dest bo. Ê hetê de, nata û bota de îta û uca de nêbeno. A ke ANAP têk berd, a ke DYP têk berd na ya. Beno ke Tirkîya do îdare nêbibo”. Senî ke rayberî AKP vano, na partî, emanetî şar îxanet kerda.
No îradeyo deshelatdar hendêk bi xo qedr bîyo sermest ke, êdî têk şono. Do aqubetî AKP bibo, aqubetî ANAP û DYP… Komara Tirkîya de verê verkanî her îqtîdaro sîyasî, qabe seruber kerdina dewleta ceberut wezîfedar bîyê ke, hetana ewro tu îqtîdaro sîyasî qabe yew dewleta hikuknas xîret nêkerdo. Fambi nayan hetana ewro, şarî Tirkîya laîk yew dewleta hikukî nê vîna. Demokrasî, hikuk bol ami. Hetana ewro îradeyo sîyasî meylî da ‘pîroz dewlet’ û ‘baba dewlet’. Meylî hikumato peyîn AKP zî tekperestî ser o bi. Ayera Komara Tirkîya dewletêka bê hikuknas a. Dewleta çekdaran û brokratan a. Û dewleta dizdan a… Malesef Komara Tirkîya pê hikuk îdare nêbena. Ser o de Komara Tirkîya yew qanunî dewlet a. Rojanê pê qanunan îdare bena. Kurdîstan de qanun zî çîın o. Tabî ke şelikî kurd her daîm potamsîyel sucbar o. Nayan qabe kurd qaîde, qanun û hikuk namê kerdbi ‘alawerê-dalawerê…’.Senî bo kurd îna îdare beno. Na paket de çi teklîf benî, ma bi ewni.
Bê destûrî dozger û dadgerî, polîs keyfî bê hîç sinor şikeno lêgêyrayîş bikêro. Şikeno telefonan goşdarî bikêro. Kesan bigêro bin çîm û keyfî ceza bido. Heta şikeno helê keso bi şuphe giran bikişo zî. Komelî de yew çalakî ancex polîs teqdîr bikêro se a çalakî pêk yena. Polîs awe rengîn û gaz eştiş de tam beno serbest. Na paket de rengî AKP zî bi aşkera. Wazena, heza parastin(leşker û polîs) ra destêk ragêro, biba dîktator. Wazena bi şîdet û zor bibo hikumran. Herîn de ewletîya komel, ewletîya îqtîdarî xo bikêra esas. Biba dewleta polîs. AKP şarî Tirkîya xapînena. La nêzana sîyasetî ey, sîyaseto qilerîn êdî pere nêkeno. Şar demokrasî, azadî û haşîtî wazeno. Şar êdî xo rê sultan, hikumran nêwazeno. Xulase; Tirkîya rayiro di çetel de ya. Ya bena dewletê şar, ya zî bena dîktatorî ya. Belê, AKP muqtedîr bîya la şaş gureyena. Do bibo ANAP û DYP…
