Rojnameger-nuştox Levent Gultekîn şahidê îqtîdarê AKPe ya 13 serran o û nêzdîyê 30 serra ke mîyanê tevgerê Îslamî de ca gêno.
Levent Gultekîn bal ant ser polîtîkayê AKPe ke roj bi roj bedilyena û wina domna: “Tirkîya de zaf hetî wextê ke muxalefetî de yî sey demokratan têgêrenî, labelê wexto ke benî îqtîdar aye wext bedilyenî û benî faşîst. AKP zî heman ravêreyeye cuyay. Verê îdîa, rêgez û erjê AKPe estbî. Mîyanê îqtîdaranê Tirkîyaye de zaf hêz bî. La çîyê ke soz dayî yew zî nêardê ca.”
Îdeolojîya AKPe têk şî
Gultekîn dergeyîya qalîkerdişê xo de cayo ke eyro AKP tede yo sey ‘têkşîyîş’ nirxna û wina vat: “No têkşîyîş zî yê kesan nîyo, îdeolojîk o. Êy aye îdeolojîye reyde kewtî rayîr labelê eyro aye îdeolojîye ra cîyayêr têgêrenî. AKP cayo ke amey de ti sozê xo nêardê ca. Zanîngehî ra heta burokrasîye, medyaye ra heta weşîye xeylê qadan de AKPijî estî, labelê nêy qadan de welat mîyanê halo ke felaketî de yo. AKP têkşîyîşê îdeolojîye cuyena, êdî qalê înan ke şarî ra bivacî nêmend.”
Sey maxdur têgêrena
Gultekîn ciresna ke semedê ke wextê xo de dîndarî amey maxdurkerdiş hîna nêbîbî demokrat, bî îqtîdar û wina domna: “Psîkolojîya maxdurîyetî nêverdano ke hetgirê AKPe bibî demokrat. No semedî ra AKP nêşîna bibo demokrat û wexto ke hêz kewt destê ci tepa agêra îdeolojîya xo ser. Yew manaye de maxdurîyet vernîya demokratbîyîşî de beno asteng. Dewlet nika zî wazena HDPe kaş biko mîyanê şaşîya inasarên. HDP zî semedê ke maxdur a ney, lazim o semedê ke azadîwaz a biba gird.”
Tena PKK eşkena
Gultekîn qalîkerdişê xo wina peynî kerd: “Tirkîyaye de di hetî estî; hetê êy ke aştî wazenî û êy ke nêwazenî. Erdogan ke vatênê: “Ez 550 wekîlê mîllî û yerlî wazena” di eslê xo de no vatiş qedîyayîşê îqtîdarî nîşan dano. Ger ke HDP waştişê xo yê aştîye verdewam biko do demo ke nêzd bibo hembarê îqtîdarî. No welatî de êy ke eşkena kayê îqtîdarî xira bika PKK ya. AKP bi serê xo tena bibo îqtîdar zî êdî nêşkena Tirkîyaye rayîr bîşêro. ”
DÎHA/STENBOL
Her ke şono bawerîya ma gird bena
Konseptê şerî ke AKPe visto dewre sero qedexeya vecyayîşê teberî û dima zî qetlîamî dom kenî. Aktîvîstê Hewldayîşê Cenîyan a Semedê Aştîye ya Îzmîrî (BIKG) hemverê konseptê şerî ya AKPe vanî aştî û qetlîamê ke Cizîr û Bismilî de amey kerdiş ra AKPe sey verpersîyar veynenî. Babete sero Aktîvîst Seval Ekîcî zî ard ziwan ke: “AKP semedê ke weçînayîşî ra hêvîya xo birnayo, sey hukimatê şerî têgêreno. Wazeno îqtîdarê xo bi şerî reyde awan biko. AKP demo peynî de laşê ganî nêy, laşê merdeyan ra tersena. Ma zî sey cenîyê rojawanijî na babete de çi destê ma ra bêro ma kenî.”
Heme dejî seyyewbînan î
Aktîvîst Demet Dîlenç ard ziwan ke Bismil de Elîf Şîmşek a ke 8 serreyî û Berat Güzel ê ke 12 serreyî hetê dewletî ra amey qetilkerdiş û wina domna: “Ma cenî heta peynîya emrê xo do aştîye biqîrî û ziwanê aştîye ra zî fek veranêdî. Ma hemverê nêy konseptî do raşteyan de bibî. Dejê dayîka Bismilî çîyo se, ya dayîka Îzmîrî zî heman dej o.”
Aktîvîst Ozlem Gunduz zî vat: “Bismil û Cizîr de merdişê domanan rîyê şerî yê bêexlaq ma ra nawneno. Heta nika nêzdîyê 20 cenazeyî sîndor de vinderte yî. Hezey ke no bes nêbo, sero hîna kesên cîya zî kişenî.”