Kurdistan de xeylê bajaran de xoverdayîşêko tarîxî yê xoserîya demokratîke ame nîşandayîş. Sûr, Cizîr, Farqîn, Şirnex, Gever, Nisêbîn, Hezex û sewbîna xeylê cayan de ciwanî vera tanq û topan de bi îradeyêko gird xover dayî. Nînan ra yewe zî xoverdayîşêko bajarê Şirnex de ame nîşandayîş o. Endama YPSyî Dîdar Çîyaya ke xoverdayîşê Şirnex de ca girewtbî, qala wextê xoverdayîşî kerde. Çîyaye va ‘hîna xoverdayîş dest pênêkerdbî, ma barîqatî awan kerdbî’ û qiseykerdişê xo wina domnaye: “Bado ke amadekarî temam bîyî, ma YPS îlan kerd. Îlankerdişê YPSyî heyecanêko gird da. Ez Şehît Gulane û Şehît Asya ra tesîr bîya û beşdar bîbîya.”
Şar fedakar o
Çîyaye hayr ant xoverdayişî de rolê şarî ser û enê detayan bare kerd: “Dima ra ma şarî reyde kombîyayîşî viraşt û perwerde da şarî. Şarê Şirnexî bi hawayêko gird beşdarê xoverdayîşî bî. Hetê embazî de fedakarîyêka girde estbî. Ma taxa Bahçelîevlerî de seba cinîyan dewreyêka perwerdeyî akerd û dima ra hûmara cinîyan zêde bîye, ma dewreya 2. taxa Cumhurîyetî de akerd. Dewreyê ma yê têmîyan zî estbîy; ma ê dewreyan de perwerdeyê leşkerî dayênê. Taxa ma de hûmara cinîyan zêde bîye. Hîna ablûqa dest pênêkerdbî, embazê Asya, Agir, Xwînrêj, Yilmaz û Koçer şehîd kewtî. Embaza Asya bi vindertişê xo quwet dayêne merdimî. Dayîkê taxe Asya ra zaf bitesîr bîyênê. Wexto ke embazî şehîd kewtî ez perwerde de bîya. Mi her tim rayîrê înan xo rê esas girewt.”
Hûmare zêde bîye
Endama YPSyî Dîdar Çîyaye qiseykerdişê xo de qala tewrbîyayîşan kerde û wina va: “Perwerde ra dima her kes erşawîyabî cayêk. Ez reyna taxa Bahçelîevlerî de mendbîya. Verikîn hûmara cinîyan kêmî bîye, dima ra wexto ke YPS ame îlankerdiş, beşdarbîyayîşê cinî û camêrdan xeylê zêde bî. Wexto ke hûmare xeylê zêde bîye, ma YPS Jin awan kerd. Ma kişta tumenê leşkerîya dişmenî de awan kerd. Verê cû cinîyî nêeşkenayêne keyeyê xo ra bivejyî, la dima ra bi hawayo asan vejîyayênê û beşdarê şerî bîyêne.”
Çîyaye behsa moralê ciwanan kerd û wina va: “Wextêk ra pey abluqa dest pêkerd. Moralê ma duştêko zaf berz de bî. Her kes meterîsanê cîya-cîyayan de cayê xo girewtbî. Ma cesaretê yewbînan ra tesîr bîyêne.”
Dişmenî zerar da
Çîyaye dîyar kerde ke dişmenî zaf zirar da şarî û enê detayan da: “Şarê Şirnexî bi moralêko gird beşdarê xoverdayîşî bîyêne. Hetêk ra çalakîya vengvetişî ameyêne kerdiş û heto bîn ra dayîkî bi tilîlîyanê xo piştî dayêne xoverdayîşî. Dişmenî bi kobra û gazê îsotî mudaxale kerdêne. Dima ra çalakîyê embazan dest pêkerd û dişmenî zî bi kobrayan dayêne ma ro. Her kuçe de çadirê ma estbî û dişmenî bi mobeseyan taqîp kerdêne û bi suîqast dayêne şarî ro. Dişmenî zaf zirar da şarî. Seba ke şar biterso û zirar bivîno, çi destê dişmenî ra biameyêne, kerdêne. Labelê şarî bi ti hawayî peyser game nêeştêne û dişmen hîna zaf hêrs bîyêne. Dişmenî her hetî ra hêrişê şarî kerdêne. Embazan dayêne tanq û wesayîtê zirxinî yê bînan ro. Ma hîna destpêk de 3 tanqî îmha kerdbî. Suîqastkarê ma zaf bihêz bî û ma terso ke çimê dişmenî de bi hawayo asan dîyêne.
Rolê înan gird bi
Dîdar Çîyaye daye zanayîş ke şer de bitaybetî sabotaj û suîqastkarî rolêko gird kay kerdêne û wina dewam kerde: “Xora ma derbeya tewr gird bi nê raybazan dayêne dişmenî ro û dişmenî bêtesîr kerdêne. Dişmen qet bejayî ra nêameyêne û zaf tersayêne. Dişmenî nêewtanayêne ke bi hawayo sing bi sing ma reyde şer bikero. Dişmenî suîqastkaranê xo cayanê winasîyan de bica kerdêne ke merdim tersê înan fam kerdêne. Psîkolojîyêko winasî înan de virazîyabî bi bermayîş xo peyser antêne. Ma bi hawayo zelal înan dîyêne.”
Do vinî bikero
Çîyaye peynîya qiseykerdişê xo de va ‘mi hetî de xeylê embazî şehîd kewtî’ û qiseykerdişê xo wina qedênaye: “Ez tîya ra veng dana şarê Şirnexî, se beno wa bibo, wa fek têkoşînê xo ra veranêdî. Wa seba ke heyfê xo bigîrî, mîyanê şerî de bibî. Wa nêrî kayanê AKP. Dewlete bi xo keyeyanê şarî rijna û şarî qetil kerde. Nika zî wazenî rolêko baş kay bikerî. Hukmatê AKP mehkumê vînîkerdişî yo, dewletêka do bi wehşetîya xo derbazî tarîx bibo. Ganî şarê Şirnexî nêyî bivîno û goreyê ci hereket bikero. Nê prosesî wa kes vîrî nêkeno.”
Dişmenî netîce nêgirewt
Endama YPSyî Dîdar Çîyaye qiseykerdişê xo de qala çalakîyan kerde û wina va: “Wexto ke şer dest pêkerd, dişmenî bi ti hawayî nêşînayêne bejayî ra bêro ma ser de, her tim dûrî ra hêriş kerdêne. Seba ke hêzê YPSyî cayê stratejîkan de bica bîbî, teknîkê dişmenî bêtesîr bîbî. Xora ge-ge cayê ma ameyêne bedilnayîş. Meterîsê mi de 3 cinîyî û 2 camêrdî estbîy. Berpirsîyarê ma embazê Tufan û Xwînda bîy, dima ra Tufan û Hisnî wexto ke seba çalakîyêk şîbî, şehîd kewtbî. Embazê Hisnî zewejnaye bî û domanê ci estbî. Tim vatêne ‘ez seba domananê xo û seba heme domananê kurdan têkoşîn dana.’ Embaz Tufanî zaf çîyî bi ma da musnayîş. O bi xo zî tim dişmenî ser de fikirîyayêne û şehîdanê sifteyînan ra yewe bî. Ma zî dima ra seba ke heyfê înan bigîrî, bi hawayêko gird têkoşîn da. Dişmenî bi obus, hawan, tanq û sewbîna hêriş kerdêne, la netîce nêgirewtêne.”
ZEYNEP NÊRGÎZ BOTAN / ANF / BEHDÎNAN