Goreyê no taslaxî ger ke bexçeyê zeytunan ke 25 donimî ra şenikêr bibo, eşkeno statuya zeytunîye ra bêro cîyakerdiş û sey ardê asayîn bêro qebulkerdiş. Rayna heman caye de ger ke mumkin bêro dîyîş weyra de enerjî û awanî eşkenî bêrî awankerdiş.
Ger ke no taslax bêro qebulkerdiş, aye wext Tirkîyaye de vernîya xebatê petrol, gazê xozayî, rayîr, cereyan û sewbîna çîyî eşkenî bêrî akerdiş. Babete sero xozapawitoxî qalî kerdî.
Wazenî biqedênî
Zerrîwaştoxê Greenpeaceye û xelqkerdoxê zeytunan Semîh Îgnecî ciresna ke bi no rey do vernîya qadê rantî bêrî awankerdiş û vat ke bexçeyê zeytunan reyde hîna zafêr citkaro şenik pê eleqeder beno. Îgnecî dergeyîya qalîkerdişê xo de ard ziwan ke cayê zeytunan hîna zafêr awayo 4 donim yenî weçînayîş û wazenî ke zeytunvanî biqedênî.
Maden û enerjîyê çin kenî
Serekê Odeya Endezyaran a Zîraetî yê Şaxa Edeneye Semîh Karademîr dîyar kerd ke Tirkîya semedo ke lazimîya xo ya rûnî pê bîyaro karê zeytunvanî kena û wina verdewam kerd: “Cayê zeytunan qanûno ke 1925’î de amey vetişî reyde ameynê pawitiş, la taslaxo ke nika wazenî bikî qanûn reyde zî wazenî cayê zeytunan çin bikî. Wextê no îqtîdarî de heme çî semedê ke santralê enerjîye, înşaat û madenan rê ca biakerî, yenî kerdiş. Ger ke no taxlax bibo qanûn, aye wext do lazimîya rûnî vêşî bibo.”
DÎHA/EDENE