ÎSAM ABDULLAH / ANF / QAMIŞLO
Dewleta Tirkî vera Rayberê Şarê Kurdî Abdullah Ocalanî de 20 serrî ra zêde yo ke tecrîd bikar ano û bitaybetî çend serranê peyênan de tecrîd açarîyayo îzolasyonî. Tewr peynî serkêşîya Hemsereka Kongreya Komelê Demokratîkî Leyla Guvene û bi hezaran hepsîyan de grevê vêşanîye dîyabi destpêkerdene û netîceyê grevan de tecrîd qismêk wedarîyabi. Labelê nika tecrîd reyna dewam keno.
Vera tecrîdî de reaksîyonê şarî dewam kenî. Ereb û Suryanîyê ke Dêrik de cuyenî, dîyar kerd ke tecrîd biratîya şaran û demokrasî ser o yeno domnayene. Mihemed El Xidiro ke Dêrik de cuyeno da zanayene ke Rayberê Ocalan fikir û felsefeya xo seba biratîya şaran û neteweyan bikar ano.
El Xidirî va ‘şarê ke Vakur û Rojhelatê Sûrîye de cuyenî saya projeyê neteweya demokratîke de mîyanê aştî û huzûrî de cuyenî’ û wina dewam kerd: “Felsefeya Ocalanî vera AKPyê Erdogan û çeteyanê ci de ya. Cok ra AKP biratîya şaran û demokrasî tecrîd keno. Ganî tecrîd bêro wedarnayene û heme şarî vera Erdogan û çeteyanê ci de bibî yew. Rayîrê çeteyan ra xelisîyayîşî Neteweya Demokratîke yo.”
AKP seba ke xo bixelisno, tecrîd keno
Sîda Henna Îbrahîma Suryanî zî va ‘fikrê biratîya şaran Erdoganî tersneno’ û wina domnaye: “Tirkîya seba ke problemanê xo ra biremo, tecrîdî bikar ana. AKP seba ke xo parçebîyayîşî ra bixelisno, tecrîdî domneno. Şarê ke azadîye wazenî, rêxistinê heqê merdiman û herkes ganî AKPyî ser o zextanê xo zêde bikerî ke tecrîd biqedîyo. Azadîya Ocalanî azadîya heme kesê ke bawerîya xo bi demokrasî û biratîya şaran ardî ya.”