AKP yew bi yew peymanan îmze keno û domanî dîyenî destê tarîkatan. Wezîrîya Perwerdeyî ya Mîllîye Serekîya Karê Dîyanetî reyde peymanêk îmze kerde û çarçewaya na peymane de sere de Weqfê Ensarî, TURGEV, Weqfê Xizmetî, Weqfê Hayratî, ÎHH, Weqfê Furkanî, Cemîyetê Îlîm Yayma û sewbîna weqfî do dersê mekteban de bi hawayo ‘Perwerdeyê Erjan’ de ca bigîrî. Heto bîn ra mufredat de mefhûmê ‘cîhad’ zî do bêro zêdekerdiş.
Her çiqas ke par Weqfê Ensarî de 45 domanî raştê îstîsmarê cînselî ameyî zî, Wezîrîya Karê Perwerdeyî Weqfê Ensarî reyde peymanêk îmze kerde. Goreyê na peymane, weqf eşkeno Merkezê Perwerdeyî yê Şarî ke hûmara ci qasê hezar a de mufredatê perwerdeyî amade bikero. Reyna weqf eşkeno mekteban de hetê huner, spor, sosyal, kulturî, ilmî û teknolojîk de kursan biakero. Heto bîn ra weqf eşkeno mîyanê welatî de kampe û ger organîze bikero. Na peymane do heta 10 serran dewam bikera.
Cîhad mufredat de yo
Sîstemo newe yê perwerdeyî bin nameyê newetî de temamî bîyo dînî û mefhumê cîhadî ameyo zêdekerdiş. Wezîrê Perwerdeyo Mîllî Îsmet Yilmazî îzehetêk da û wina va: “Dibistanê seretayî û mîyanên de 17, lîse de 24, ÎHL de 10 pêro pîya 51 mufredatê neweyî ameyî amadekerdiş. Cîhad mefhûmêkê ke dînê ma de esto û do dersê fikihî de bêro dayîş. Reyna dersê bîyolojîyî ra evrîm ame vetiş.”
Masrafî wezîrîye ra
Heto bîn ra Wezîrîya Polîtîkayê Sosyalî û yê Keyeyî Weqfê Kulturî yê Muradîye ke sey polê tarîkatê Nakşîbendî yeno zanayîş reyde peymanêk îmze kerde. Çarçewaya peymane de, vejîya orte ke weqfî Anqara de 31 keyeyê domanan akerdo. 6 domanê 5 serreyî keyeyêk de yenî bicakerdiş û her keyeyî de 3 personelî ameyî bicakerdiş. Goreyê peymane masrafê heme keyeyan hetê Wezîrîye ra yeno dayîş. Eke domanî 18 serreyîya xo pirr bikerî, eşkenî bidîyî keyeyo pawitox. Peymane do heta 10 serran dewam bikera.
ŞÛJIN/ANQARA