Labelê her çende ke bira bêçalakîtî ame girewtiş zî hêrişê dewletî kêm nêbî, hetta her ke şono vîşêr beno. Babete sero Serekê Baroya Rihaye Hîkmet Delebe û Sîyasetmedarê Kurd Ferîdun Yazar qalî kerdî.
Wazenî ters awan bikî
Serekê Baroya Rihaye Hîkmet Delebe teqyayîşê Enqere, Pirsûs û Amedî ard vîr û wina vat: “Semedê ke verpersîyarê teqyayîşê Amed û Pirsûsî nêvejyay werte, teqyayîşê Enqereye virazya. Ser nêy hedîseyan bira limiteye esto. Nêy dosyaye semedê ke çapemenî û pawitoxan ra yeno limitiş, hêzê asayîşî zî hewl danî ke nînan biliminî. Îqtîdar nika vana ke ma mutabakatê Enqereye nas nêkenî. Teqyayîşê Enqereye verpersê AKPe ya dijî bira bêçalakîtîya KCKe ya. AKP 7’ê Hezîrane de semedê ke tena serê xo nêbi îqtîdar, welatî dekerd mîyanê kaosî. Ma wazenî welat wa no kaosî ra bivecyo.”
Provokasyonan kena
Sîyasetmedarê Kurd Ferîdun Yazar zî ard ziwan ke AKP semedê ke bira KCKe ya bêçalakîtî veng biveco wazena provokasyonan biveco û wina domna: “Bi no hawa waştî ke KCK kaş bikî mîyanê şerî. Vanî ke ‘Biewnênê bira bêçalakîtî esta, labelê lejker û polîsanê ma kişenî.’ Bi nêy vatişan reyde propagandaya weçînayîşî kenî. Hêzê dewlete tersenî ke bawerî û şarê cîya bêrî hetê yewbînan. No semedî ra Pirsûs û Enqere de teqyayîşî viraştî.”
Yazar wina peynî kerd: “Wazenî bi no hawa kurdan tena verabidî. Her kes zano ke êy ke huzirê şarî xira kerdî AKP û Erdogan bi xo yî. Lazim o dewlet fek polîtîkayê ke merdiman benî mergî ra verabida û persgirêka kurdî çareser bikera.”
DÎHA/RIHA