“Nika AKP û dewlet bi heme hêzê xo hêrişê şarê ma kenî. Veradê waştişê şarê ma qebul bikî, hêrişê mezelanê şarê ma daxî kenî. AKP bi vatişê çareserkerdişê persgirêka kurdî amey îqtîdar, labelê çareserkerdişî ra hîna zafêr şaran kerd dişmenê yewbînan. Tewr peynî zî bi ‘Toroso sipî’ şarê ma ra gefî werdî. Bi no hawa wazenî vajî ‘Ya ma, yan zî merg’. Her roj papoleyê Cizîr, Silopî, Nisêbîn, Gever û sewbîna cayî yenî dagirkerdiş. No semedî ra her rayê ke şêrî AKPe, do bibo hîna zafêr hêrikyayîşê gonîya şaran.”


AKP da destpêkerdiş 

Dilpet dergeyîya qalîkerdişê xo de bal ant ser ravêreyeya çareserîye û wina domna: “Serra 2013’ê de Rayvertîya ma bi ravêreyeya çareserîye waşt hêvî bido awankerdiş. Labelê wextê ke mutabakatê Dolmabahçeye ame aşkerekerdiş û 5’ê nîsane ra dima serekkomar vejya û vat ez mutabakatî nas nêkena û heme pêvînayîşan red kerdî. Xora bade pêvînayîşê ke Rayvertî reyde ameynê kerdiş zî dayî vindarnayîş. Bade zî AKP şer day destpêkerdiş. Erdogan her tim bi zîhnîyetê serektî tê gêra. HDP dijî nêy zîhnîyetî 7’ê hezîrane de serkewtişekî gird dest vist. No serkewtiş hem vernîya îqtîdarbîyîşê AKPe de astengî viraşt û hem zî darbeyekî gird da polîtîkayê AKPe ro.”


DAIŞ û AKP eynî yî

Dilpet ciresna ke AKP serkewtişê HDPe qet hezm nêkerd û wina verdewam kerd: “Dîroka komarî de tewr zaf şarî dema HDPe de beşdarê meclîsî bî û meclîsî de xo temsîl kerdî. Şarê ermenî, roman, asûrî-suryanî bi kamîyanê xo mîyanê meclîsî de ca girewtî. AKP ya ke yewperest, no semedî ra hende hêrsbîyaye ya. Şero ke hemverê HDPe de dayî destpêkerdiş, verê weçînayîşê 7’ê hezîranî de vistbî dewre. Her çende ke vatî heme hêrişê hetê DAIŞe ra ameyî kerdiş zî, pêy hemînan de Gladyoya AKPe esta. AKP û DAIŞ sey di rîyê madalyonekî yî.”


‘Ya îqtîdar ya şer’

Dilpet ard ziwan ke qetlîama Enqereye semedê îqtîdarbîyîşê AKPe amey kerdiş û qalîkerdişê xo wina peynî kerd: “Erdogan û AKP vanî ‘Ya ez bena îqtîdar, ya zî ez zilmê ke dîrokî de qet nêamey dîyîş kena.’ No semedî ra ma dekewtî ravêreyeya weçînayîşê newe. 7’ê hezîrane de encamêkî vecya werte reyde meclîsî de îradeya hembar eşkiyaynê bêro awankerdiş. Labelê şer ame meclîsî ver. Lazim o bêro zanayîş ke her raya ke 1’ê Teşrîne de yena xebetnayîş, semedê aştîye ya. AKP wazena dîktatorî awan bikera, no semedî ra eşkena qirkerdişê Enqereye ra girdêr qirkerdişan bikera.”


Semsurijî welatperwer î

Dilpet qalîkerdişê xo de vat ke şarê Semsurî welatperwer o û wina vat: “Ez veng dana şarê Semsurî; Semsur cayo ke DAIŞ tede binge girewto û her tim zî bi bombeyê ke DAIŞ teqnena reyde yeno rojdem. Demo kan de beno ke çend tarîkatan ra wayîrî kerdo, labelê şarê Semsurî şaro ke welatperwer, aştîwaz û çareserîya demokratîk wazeno yo. Lazim o her raya ke bêro xebetnayîş, bi haydar bêro xebetnayîş. Her rayê ke şero AKPe re do hîna vêşî bombe biteqyî û nameyê ci hîna zafêr bi DAIŞe bêro vîrardiş. Ez sey semsurijek şarê Semsurî ra vana ke wa rayanê xo semedê hêzkerdişê HDPe bixebetnî. HDP projeya pîyacuyayîşî ya.” 


 ANF/BEHDİNAN