Vanê ya; ‘Mûma zûrkerî heta şewî cifîyeno.’ Wexta hewnaşîyişî AKPî zî ame yo. Bi polîtîkay xo yê zûrker, zilm û zordarîyî her tim waşta ke bîra ma kurdan bikena ma, bi saxî bikera mezelî. Rayna min tikey rayan ardbi ziwan ke hêza şaran ya zey Kobanî ver de ti zilimkar û dewlete nêşkeno bivindero û mahkûmê têkşîyişî yo.
AKP û Tirkîya pîya, çend rojan verî, bi qisê Erdogano ke xo împarator îlan bikero ra hadre kerdê, bi qisêy giran yê semedê zûrkeraya Erdoganî ra sereyê jûbînan şikitîy. Semedê şikitişê înan zî têkoşîna kurdan ya serkete ra bi. Vengê deja sereyê înan ya xoverdayişê kurdan verî ra, resa heme cayê Dinyayî. Na ray Homa hetê kurdan bi û AKPî bivir da lingê xo ro.
AKP mecbûr mend ke bivajo ‘hukûmat muhatabê çareserî ya mesela kurd a…’ No yeno mana ‘Tendûr bi tir û fisan germin nêbeno’. AKP bi zûran û zilmî keştîya ke rayîra berdê de enerjî nêverda. Çimkî proje û pratîk enerjîyan virazeno. No tewr viraştişê enerjîyî zî ne AKPî de ne zî partîyê tirkan de çîno. Va, aw û tînc zî ey ra miradyayê û keştîya AKP orteyê Gola Wanî de tik û tenê menda û kaptanêy ke ey romitnê na gam semedê rayîranêşîyişê keştîyî bêrotabîyî ra erzenê jûbînan û potê jûbînan yê gemarine qîrenêy.
Tabî waxta ke qîrenêy potê jûbînan danêy teber la medya zûrker ya xo rotbi AKPî, zey verî hîre meymûnan kay kerd. Medya tirk ya ke muhalefeteya AKPî kerdê zî, her yew kişteke de wazena laşê AKPî ra perçeyeke goşt cira bikerey, ke Tirkîyayî de bibêy îqtîdar û berîkanê xo pir bikerêy. HDPe zî pey weçînayişî goreya taxmînê min seyî ra 12 û 13 do bigo ra pey bibo muhalefet û meclîsî bişikyo Tirkîyayî rayî ra bibero.
Çîyê ke ez wazena bivajî AKP heta weçînayişî gere nêmiro. Çimkî HDPî ver de partîya ke bişikyo gureş bigero nêmaneno. Vanê ya ‘ şêr bi şêran ra, pisîng bi pisîngan de şer biko adil o’. Hetê bînî ra eke AKP na demî de kokî ra bişêro şarêy Tirkîyayî ser de cuyenêy bi her hawayî do perçe perçe bibêy. Tirkîyayî de şaran do hewna zaf perçe perçe bikerêy û şerêy mezheban hewna zaf bivirazêy. Çimkî esas ney şerî ra zaf musaît o û vergîy no rojî pawenêy.
AKP ewro zaf gunî vinî keno. Beno ke heta nêreso weçînayişî û gonî vinîkerdişî ra bimira û bikûro mezelê xo yê bi esasê zûran semedê kurdan kenabi. Ez wazena ke wa kurdîy û dostêy ci ke nêwazenêy şarêy Anatolîyayî helaq bibêy. Hetê bînî ra ma şikyenê AKPî ra pey weçînayişî de bivajêy el fatîha û helawa AKPî bi destê şarêy demokrat bivirazyo û bîr û mezelê ke AKPî bi destê xo kena ser de vila bikero û fatîha xo ser de biwanêy.
Ehmedê BIRA