Alozînê miyanê AKP de, bi qisanê Serokkomarê tirk Tayîp Erdogan û vatoxê hukumetê AKP Bulent Arinç xo da tever.
Hevserokê HDP Selahattîn Demîrtaş alozînê miyanê AKP de vejiyayê werte sero, ANF rê qisey kerd û mesajê muhîmî day. Demîrtaşî xorîbiyayinê alozînê miyanê AKP de, zey xizmetê rind ê qandê menfatanê şaranê Tirkiye hesibina û vat: Enê munaqeşey îşaretê startê veracêr şiyayinê AKP yo.
Demîrtaşî ard ziwan ki peyniyê hamleyanê HDP û Hereketê Azadiyê Kurdi, serkewtinê Kobanê û qerardarînê Rayverê Şarê Kurd Abdullah Ocalan, alozînê miyanê AKP de kerdê xorî. Demîrtaşî vist vîrî ki AKP tim propagandayê "zeki hetê kurd de, alozîn û zaf-serrîn estbo" kerdê û vat: Nika vejiya werte, AKP miyan de zaf-serrîn esto. Ma bi xo zanayê, miyanê AKP de alozîn û munaqeşey estê. Ena alozîn nika heveyna bî xorî. Nika gerek mûxatab belû bibo. Erdogan çiyê vano, Arinç çiyê bîn vano. Hukumeto nika ra tepiya çi bikiro? Wayirê vatena esasî kamo? Hukumeto yan jî Erdogan o?
Demîrtaşî vatenê Erdogan ê zey 'Heyeta çimdarîn nêbeno û kombiyayişê saraya Dolmabahçe şaş bi" ser jî qisey kerd û wina vat:
Enê heme çiyan sero verî munaqeşey biyê. Mesajê Ocalan bêkontrolê dewlet nêvejiyenê tever. Hetanî verê çend rojan winî nêvatê. La belê senî ki Erdoganî ewna, eleqeyê qandê HDP beno vêşî, nika dest bi manewrayan kerd. Kiştê ra qandê weçînayinî mesajan dano. Kişta bîn ra jî, zîhniyetê xoyê rastîn rafîneno çiman ver. Nika lazimo hukumet qerar bido. Goreyê hukumetî "meseleya kurd esta çiniya?' Eki meseleya kurd çiniya, heyeta çimdarîn çima roniyo?
Demîrtaşî cewab da îdîayanê rayveranê hukumetê tirk ê zey "HDP mesaja Ocalanî vurnayo" jî û vat: Mesaja Ocalanî de, qandê kongreyê PKK tarîx çinêbî. Ocalanî mesaj senî daya ma, ma winî eşkere kerde. Erkê mayê vurnayinê mesaja Ocalanî çiniyo. Derheqê tarîx de, hukumet wasten û pawitinê xo ê tarîx ano ziwan. La belê Ocalanî qalê tarîx nêkerd.
Demîrtaş vist vîrî ki Ocalanî mesaja xo de, qalê Keyeyê Demokratîk ê hetbar ê Miyanê Rojhilatî kerdo û vat: Ocalan zaf weş û rast îfade kerdo. O keyeyê demokratîko ke birêz Ocalan qal keno, HDP bi xo ya. HDP keyeyê demokratîk ê heme kamî, etnîk, bawerî û kultur ê şaranê Tirkiye yo.
ENQERE
Arinç û Gokçek kewtî qirika pêjewîn
Alozînê miyanê AKP de, bi munaqeşeyê Alîkarê serokwezîrî Bulent Arinç û Şaredarê Enqerî Melîh Gokçek dewam keno. Arinç û Goçkeç bi ziwanê tûja pêjewîn sûcdar kerd.
Alîkarê Serokwezîr û vatoxê hukumetê tirk Bulent Arinç badê kombiyayişê Komîteyê Wezîran qisey kerd. Arinç vat ki, iyê "heyeta çimdarîn" ê qandê demê çareserîn ronê û o texmîn kenê heyeta 5-6 kesîna roniyo. Arinç wext pesnê Erdoganî jî da û vat: "Eki ma qandê demê çareserîn, serokkomar rind xeberdar nêkerdo, kemîyinê ma yo."
Bulent Arinç bado jî, bi sebebê o zey xizmetkarê Hereketê Fetullah Gulen mûsnayo jî, bi ziwanê tûja Şaredarê Enqerî ê partiya xo Melîh Gokçek hedef girot.
Arinç vatenê Gokçekî zey bêterbiyeyîn hesibina û vat: "O kesê bêhasiyet o. Kesê bêhasiyet nêşeno îstifayê min biwazo. Gokçek bi xo qandê weçînayinî virara Hereketê Pararlelî de ronişto. Parsel bi parsel Enqere roto. Badê 8'ê hezîran, ezo Gokçekî ra hesabî pers bikirî."
ENQERE