Şarê Dêrsime zî waşt bi na şehîdgehe bi coş û heycanê biakerê la belê akerdişê şehîdgehe ra polês û cendirmeyê AKP destûr nêday û Dêrsime girewtê bindorpêçê xo. Verba no tade û zilmkarî ya poles û cendirmeyan bi rayverîya MEYA-DER di kûçeya Hunere ra hetanê Raşteyê Azadî ra meş ame viraştiş.
Meşî ra hemserekê Şaredarîya Dêrsime Alî û Nurhayat Altun û di zaf hûmarîy de kesî beşdar bîy. Di meşe de beşdarwanê pankartê ‘Ma bi adirê azadî şorişa ra meşîyenê’ akerd û dirûşmeyê ‘Şehîd nê mirenê’ û ‘Biciwî Serek Apo’ qîray.
MA WEŞ ŞINASNENÊ
Peynîya meşe hemsereka Şaredarîya Dêrsime Nurhayat Altun qise kerd. Altun vat ke nê di rojoke dewleta tirk wazena hêzê xo, şarê Dêrsime ra bimojno û wina vat: “Ma dewleta tirk zaf weş şînasnenê, ma domananê têkoşîne, na dewlet verênan ma darde kerd û ma hema zî goristanê verênan xo nêzanê. Ma do mîrasê verênan xo verdewam bikerê.”
Altun aşkera kerd ke senî beno ke dewleta tirk destûr nêdana ke şarê Dêrsime goristanê şehîdê xo zîyaret bikerê û wina peynî kerd: “No şar, şarê xoverodayişê yê, no şar hetanê nika qet di dîrokî de sareyê xo çewt nêkerdo û do çewt zî nêkero. AKP hadî xo bizano, ma di noca de yê, haydê hodrî meydan. Ma hişyar kenê, do her kes hadî xo bizano.”
DÊRSIM