Parlamenterê HDPyî yê Şirnexî Huseyîn Kaçmazî muhîmîya yewîya neteweyî ser o wina va: “Tirkîya, Îran, Îraq û Sûrîye seba ke statukoyê xo bipawî, hewl danî yewîya kurdan asteng bikerî. Tirkîya bi domnayîşê tecrîdî hewl dana vernîya yewîye bigîra. Ganî heme partî û rêxistinî no proses de berpirsîyarîya xo bîyarî ca.”
Kurdê ke bi hezar serran o ke Mezopotamya de cuyenî, badê ke netewdewletî vejîyayî orte, bi tayê peymanan ameyî parçe kerdene, bi desan serran o ke raştê polîtîkayanê asîmîlasyon û qirkerdişî yenî. Sey nimuneya Sûrîye, demêko derg bênasname cuyayî. Roja ma ya ewroyî Rojhelato Mîyanên de hewl dîyeno kurdî bi hawayo parçebîyaye bêrî veradayene û seba kurdan meseleya tewr muhîme yewîya neteweyî ya.
Parlamenterê Partîya Demokratîke ya Şaran (HDP) yê Şirnexî Huseyîn Kaçmazî yewîya neteweyî ser o qisey kerd. Kaçmazî qiseykerdişê xo de qala tecrîdo ke Rayberê Şarê Kurdî Abdullah Ocalanî ser o yeno domnayene zî erjna û va ‘amancê tecrîdî astengkerdişê yewîya kurdan o’.
Kaçmazî da zanayene ke KCD û HDPyî heta nika seba yewîya kurdan xeylê komxebat û konferansî viraştî û wina domna: “Labelê netîceyê ke ame waştene, nêvejîya. Rojhelato Mîyanên de kaosêko gird esto. No proses ra tewr zaf kurdî tesîr benî û seba ke kurdî nê prosesî ra bi hawayo serkewte vejyî, ganî yewîya xo awan bikerî. Polîtîkayê ke hetê PDKyî ra yenî domnayene, vernîya awankerdişê yewîya neteweyî de astengî virazenî. Ganî partî û dezgehî xo nê zîhnîyetî ra bixelisnî û pêro pîya hereket bikerî.”
Rizgarîye tena bi yewîye mumkin a
Kaçmazî dewamê qiseykerdişê xo de wina va: “Tirkîya, Îran, Îraq û Sûrîye seba ke statukoyê xo bipawî, hewl danî vernîya yewbîyayîşê kurdan bigîrî. Ma bi yewîya neteweyî wazenî mîyanê kurdan de refleksêko ortax awan bikerî. Labelê nê welatî bi zîhnîyetê xo yê tekperestan hewl danî yewîya kurdan asteng bikerî. Nêwazenî ke kurdî bibî wayîrê statuyî. Ganî heme kurdî vera nê polîtîkayanê çar dewletan de kongreya xo bivirazî û yewîya xo awan bikerî. Rizgarîye tena bi yewîya neteweyî mumkin a. Tena rayîrê xelisîyayîşî no yo. Ma sey partîye çi bikewo ser milê ma, ma do bikerî.”
Bi tecrîdî barîkat ronenî
Kaçmazî qiseykerdişê xo de dîyar kerd ke Tirkîya bi tecrîdî hewl dana yewîya kurdan asteng bikera û wina va: “Tena Birêz Ocalan eşkeno krîzê Rojhelatê Mîyanênî çareser bikero. Ewro kurdî ancax bi mesajanê Birêz Ocalanî eşkenî bêrî têhet. Ewro seba ke na rewşe asteng bikerî, tecrîdî domnenî. Dewlete proseso ke qet cîddîyetê ci nêmendo, tecrîdî domneno. Bi nê tecrîdî vernîya yewîye de barîkatan ronenî. Ez veng dana heme partîyanê kurdan û rêxistinanê demokratîkan ke wa prosesêko wina muhîm de berpirsîyarîya xo bîyarî ca.”
MA / AMED