Rexmê ‘qedexe’yan Kurdistanijan vizêr xo resnay dewa Rayverê Şarê Kurd Abdullah Ocalan’î Amara û 67. Roja dayikbiyîna Rayverê xo bimbarek kerd. Herzewbîn damustayina piyayî de tecrîd rê nêrazîbiyen damusniya û serbestiya Ocalan’î waziya.
Parlamenter û îdarekaranê HDP, îdarekaranê DBP, hemserokanê KCD, TUHAD-FED ra piya bi seyan welatijî xo resnay keyeyo ke Ocalan miyan de ame dinya. Merasîma bimbarekîn ver keye yo ke Ocalan ame dinya de viraziya. Keye bi resîmanê Ocalan’î û alê PKK, KCD xemilniya. Welatijê ke heyecan û hîsê girdî cuwyay bi slogananê zey ‘Bicuwe Serok Apo’, ‘Mîmarê haştî Îmrali de yo’ serbestiya Rayverê xo waştî û bi deyran govend girotî. Malbata Ocalan’î ra zî xêlê kes tewrê merasîm bî û welatijan pêşwazey kerdî.
Badê vinderdişê hurmet Hemserokê TUHAD-FED Mehmet Temîzyuz’î qisey kerd, kesê ke cayanê xorayirberdişan de danê xover selamî kerd û ‘qedexe’ yê walitiyê Riha rê nêrazîbiyen damusna.
‘Tecrîd hewadê’
Mehmet Ocalan’î zî ser nameyê malbata Ocalan’î qisey kerd û kesê ke xo resnay Amara rê berxodariya xo ard zon. Öcalan’î ‘qedexe’ yê bimbarekîn lanet kerd û va, ‘Serok lîderê pêrokîn şaran û bindestan o’. Mehmet Ocalan’î vist vîrî ke Ocalan xelesnayoxê pherokîn Rojhelatê Miyanî yo û waşt ke tecrîdê vera Ocalan’î bîro hewadayen.
Hetê mîlyonan yeno qebûlkerdiş
Parlamenterê HDP yê Riha Osman Baydemîr’î zî vist vîrî ke hardê Riha bimbarek o û da zonayen ke Riha zey cayê biyayişê merdimatî yena silasnayiş. Baydemîr’î ard ziwan ke, Riha de xêlê kesayetê mihîm vejîyayê û ard ziwan ke Birêz Ocalan zî nê kesayetan ra jew o. Osman Baydemîr’î ‘qedexe’ yê bimbarekîn protesto kerd û kesê ke xo resnay Amara bimbarek kerd. Baydemîr’î da zonayen ke, şarê kurd jû roj zî raştiyanê xo ra peyser gam nêeşt û aşkere kerd ke do wextekê kilm de bireso serkewtiş.
Parlamentera HDP yê Riha û warza ya Ocalan’î, Dîlek Ocalan zî şaro ke resya Amara silamî kerd û da zonayen ke, manîkerdişî vera pêrokîn şaran ê. Öcalan vist vîrî ke xêlê kes amey derbkerdiş û binçimkerdiş û va no dirûm nîno qebûlkerdiş. Dîlek Ocalan ard ziwan ke tenya rojbiyayişa Ocalan’î nê, yê pêrokîn merdimatî yena bimbarek kerdiş.
‘Mîlyonan temsîl kenime’
Hemserokê KCD Hatîp Dîcle zî qisey kerd û wina va: “Ewro tenya rojbiyîna Ocalan’î nîya. Ma ver keyeyo ke ame dinya ra heta Îmrali hezar selamî rişenime. Şarê kurd Birêz Ocalan’î zey lîderekê stratejîk qebûl keno. Dewlet zî nay rind zana”.
Dîcle vist vîrî ke bin nameyê siyaseta tirkkerdiş de hewl danê ke kurdan asîmîle bikerê û wina va: “Rayverê kurdan yê zey Şêx Seîd, Sey Riza û Rayer Apo eşqa serbestî yê şarê kurd damusnenê. Rayver Apo’yî vera serdestan milê xo çewt nêkerd û jû rêxistina ke nêkewna bin rona”. Dîcle peynî de waşten kerd ke rojbiyîna Ocalan bibo wesîleyê haştî. Badê qiseyan merasîm bi sloganan qediya.
Tenya Amara de nê, Rojawa, Rojhelat, Başûr û teberê welatî de zî rojbiyîna Ocalan’î bimbarek bena. Kobanê de zî welatijî ver keyeyo ke Ocalan’î kerdî meyman de are bî û rojbiyîna ci bimbarek kerdî.
DÎHA/RIHA