Çeteyanê DAIŞ 15”ê îlonê 2014 de qandê îşgalkerdinê Kobanê zaf hetan ra dest bi êrişan kerd.La belê peyniyê xoverdayişê destanî ê YPG û YPJ de, Kobanê peyniyê aşma çile de, çeteyan ra xelisiya.
O roj ra na kişt, kiştê ra YPG û YPJ hamleyê xelisinayinê dewan rameno û kişta bîn ra jî, xebatê newe ra ronayinê Kobanê dewam kenê.Çarçiweyê newe ra ronayinê Kobanê de, 2 û 3”ê gulan de, Amed de jew konferansê girdo viraziyo.Konferanso rayverînê saziyanê Odeyê Bazirganîn, Jûwînê Odeyanê Mîmar û Muhendîsan, ÎHD û xeylê saziyanê bînan de viraziyeno.
Komîteyê hedreyin, qandê konferansî 350 dawetnamey rîştê. Goreyê komîteyê hedreyin, Delegasyonê Jûwînê Ewrupa ê Tirkiye, Doxtorê Sînoran nêsilasnenê, DÎSK, KESK, Jûwînê Doxtoranê Tirkiye û Saziyê Efûyê Maben-Netewî jî miyan de, xeylê saziyê netewî û maben-netewî tewrê konferansî bibê.Eynî wext de, Kurdistan, Tirkiye û Ewrupa ra jî, xeylê rojnamevan, akademîsyen, muhendîs û siyasetkarê jî tewr bibê.
Konferansî de raporê qandê newe ra ronayin, raporê tespîtkerdinê zirarî û raporê xebatan bimûsiyê.Eynî wext de, sînevîzyonê derheqê tarîx û xoverdayişê Kobanê de jî, konferansî de bimûsiyo. Komîteyê Hedrekarîn ra Ercan Arslan eleqe ant muhîmînê konferansî ser û vat: “Ma senî pêro vera çeteyanê DAIŞ seferber biyê, gerek ma qandê newe ra ronayinê Kobanê jî seferber bibê.”