Xoser WELAT
Weçînayişê 24'ê Hezîrane qedîya. Erdoganî serkewtişê xo îlan kerd û xebata xo ya awankerdişê pergala newîye keno. La hema zî mujûlîya derheqê ney weçînayişî de nêqedîyaya û do demêko derg nêqedîyo zî.
No weçînayiş, di serre de bi raybaz û awayê pêkameyişî, reyna bi tesîrê xo yê ro ameyîya Tirkîya, Kurdistan û heta Rochelatê Mîyanênî weçînayişêko cîya bi. Seba naye do ameyîye de zî zafêrî bêro nîqaş kerdene.
Dizdî, hîle û sextekarîye sebeb çi beno wa bibo, ferasetê AKP yo ke heme hetan ra Tirkîya vista mîyanê kaosêkê pîlî, hema zî se ra 40, civatê Tirkîya ra rayan geno. Persgiraya tewir pîle, na rewşe nê bi zanista sîyasî, nê civatî û nê zî polîtîke, nêşikena bêro tehlîl kerdene. Na rewşe di, hemeyê Rochelatê Mîyanênî û bi pêroyî zî civatanê ke qaşo muslumane yê de, bi heman awayî ya.
Civatê Tirkîya û bi pêroyî civatê Rochelatê Mîyanênî hezar serran zêdêrî yo, bi xurafeyanê îslamê viraşteyî, ameyê korfemîkerdiş. Binkeya ney ferasetê Îslamê viraşteyî de "qûlîtîye" est a. Homayî ra cêr dewleta est a. Serekdewlet û îdarekerî temsîlê Homa û pêxemberî, êy serê erdî yê. Îtaet ferz o. Seba naye zî raybazê zanistî, di nêy civatan de derbasdarîy nîyê.
Dinya de 63 dewletê muslumane est ê. Nêy 63 dewletan de mîlyar û nîme zêdêrî, muslumaney cuwîyenê. Mîyanê nêy 63 dewletan de, dewletêka ke bi awayêko rêkûpêk yena rayirberdene û civatê aye di mîyanê aramî û bi ewleyîye de yo, çîn ya. Heme veyşan û perîşan ê. Bi qrîzanê aborî û însanîyan reyde ribiri yê. Şarê nêy welatan seba ke welatanê xo ra vecîyê û şêrê welatanê "kafiran" behran de xeneqîyayişî genê ver çiman û heta nika bi hezaran zî xeneqîya yê.
Reyna merdim awneno nêy dewletanê Îslamî ra, di zaniste de zî seba merdimayîye çîyêke nêkerdo. Kesêy ke nêy civatan rayir ra bene, heme averkewtişanê teknîkî ke bi goreyê vatişanê înan, hetê "kafiran" ra ameyê îcadkerdişî bi kar anê la seba civatî înan heram, bi name kenê. Bi ney ferasetê apeymendeyî, civat bi temamî zaniste ra ameyo dûrîvistene.
Dewleta tirke, ferasetê nîjadperestî yê tirkîtîye reyde zî, qasêke nînan ra cîya û esasanê rejîmêkê sekulerî sero amî awan kerdene. Dinya de dewletêka bi goreyê ray û raybazanê demokrasîyî yena îdarekerdişî, ameyê biname kerdene. Bi na taybetîya xo, dewletê muslumaneyan êy bînan ra, cîya bî. Nika Tirkîya zî na cîyayîya xo vînî kena û ver bi rewşa êy bînan şina. La êy bînîy zî nêmendî. Îraq, Sûrîye, Lîbya reyna rewşa Îranî, orte de ya. Misir leweyê kelebestî ra xelesîya. Erebîstano Siûdî, bêke aqûbetê êy bînan bicuwîyo, wazeno bixo, xo bivûrno.
Di na çarçova de, Tirkîya ve bi kam cayî şina? Wina eyseno ke Pergala mîyannetewî zî na rewşe ra memnûn a. Heke nîyetê pergala mîyannetewî yê vûrnayişê Tirkîya est bê, bi tu awayî destûr nêdayê ke no weçînayiş, bi no awa bi peynî bibo. Îtîya de hesab û planêy bînîy est ê. Na zî delîlê ameyîyêka tarîye yê.
Propogandayanê weçînayiş û qiseyanê AKP-Erdoganî êy na ra verî de, tim plansazîyê 2023 û 2071 ameyê qisey kerdene. 2023, serragêrayîya se serre yê Komar Tirkîya yo. 2071 zî seba se serra ameyî, ameyêne vatene. Di no weçînayiş de 2071, yan min nêşinawit yan zî nîyame ziwan. Wina eyseno ke di şexsê Erdoganî de Dewleta Tirke zî, plansazîya se serra bêro ra, bê hîvî ya.
Pergala Hegemonîke ke çimanê xo rewşa Tirkîya rê padayê û dewletê di heman rewşe de zî tarûmar kerdîy, hesabê qilêrinan kenê. Ameyîya Tirkîya û Rojhelatê Mîyanênê, tarî ya. Di na cografîya de êy ke tewir zaf zirar vînenê û do bivînê zî, kurd ê. Xencî yewîtîya netewî, raybaza ke şarê kurdî no kaos ra, serkewte veco, çîn ya. Gere şaro kurd, heme partî û hereketê sîyasî, bi na zaneyî têbigeyrê. Gere gamêke raver, yewîtîya netewî pêk bêro. Gere şaro kurd di çarperçayanê Kurdistanî de, naye ro partî û hizbê sîyasîyan ferz bikero. Rewşe bi qaso ke ma texmîn kenê ra zî tarîyêrî ya.