Ameyoxa Tirkîye Şirnex de nimite ya

Parlamentera HDPyî ya Şirnexî Aycan Îrmeze derheqê rewşa Şirnexî de qisey kerd û va: “Ameyoxa Tirkîya Şirnex de nimite ya, wayîrvejîyayîşê Şirnex rê, wayîrvejîyayîşê heme şaran o.”

Îrmeze derheqê rewşa Şirnexî de qisey kerde û vînayîşê xo arde ziwan. Îrmezî dîyar kerde ke ‘dekewtişê Şirnexî mîyan, dekewtişê xeylê welatan ra hîna zehmetin o û ma bi polîtîkayanê serranê 90î ra xirabêran rî bi rî yî’ û va: “Serranê 90î de tîya sey ‘Komara Cizîrî’ ameyêne zanayîş, la ewro ma rewşêka hîna giranêre cuyenî. Se ra 60ê bajarî ameyo rijnayîş û tayê cayan de hema zî rijnayîş domîyeno. Ez sey şirnexij hîs kena sey ke ewja de qet banî çinêbî. Wazenî heme çîyê ke aydê demo verên î, çin bikerî.”

Leşkeran dest rona ser 

Îrmeze vist vîrî ke ‘merkezê Şirnexî de problemê hewênîyayîşê şarî esto’ û wina va: “Hetkarîyê ke seba şarê bajarî yenî, hetê Walîtî ra yenî astengkerdiş. Merdimî hetê dîyayîşê bananê kîrayî de zehmetî ancenî. Her çiqas ke nêşînbî sey verên bicuyî zî, merdimî hewl danî ke têkoşînê cuyayîşî bidomnî. Seba ke malzemeyî amebî xespkerdiş, tayê keyeyan de tena xaliyî rakerde yî. Komeleyî ameyî padayîş û ma bi îmkananê xo hewl danî ke destek bidî şarê xo, labelê walîtîya Şirnexî destûr nêdana û vernîya hetkarîyan gêna. Çend rojî verê leşkeran dest rona malzemeyê hetkarîyan ke depoya ma ya Dêrgulê de bî ser. Çi heyf ke no ma bêçare verdano û ma dejneno. Ma na babete ser o hewl da xo biresnî walîtî, la walîtî cewab nêda telefonanê ma.”

Nika dorê ma yo 

Îrmeze va ‘komîsyonê ke hetê Wezaretîya Dorme û Bajarvanî ra ameyî wezîfedarkerdiş û seba ke tespîtê zirarê şarî bikerî ameyî bajar, xeylê neheqîyan kerdî’ û wina dewam kerde: “Nê xebatan de mexdurîyetê şarî rê çareserî nîno dîyayîş. Bin nameyê ‘Vurîyayîşê Bajarî’ de 5 taxî sey cayê rîskin ameyî îlankerdiş. Badê ke qayûm tayînê Şaredarîya Şirnexî bî, heme bînayê xizmetî açarîyayî qereqolî. Esnafî bi aşman nêşînayî kar bikerî. Ma nika nêeşkenî vernîya şaredarîye ra derbaz bibî.”

Îrmeze peynîya qiseykerdişê xo de va ‘ganî her kes bêro Şirnex û hovîtîya ke esta, bivîno’ û qiseykerdişê xo wina qedênaye: “Barê tewr giran yê şerî piştîya şarê Şirnexî de yo. Şar bi nêteriknayîşê ca û warê xo, xoverdayîşêko gird nîşan da, nika dora ma ya; ganî ma piştî bidî şarî. Yê ke wazenî ameyoxa Tirkîya bivînî, ganî bêrî Şirnex bivînî. Rojê ameyoxe de do referandûmêk bêro viraştiş. Yê ke weçînayîşêk bikerî, wa bêrî Şirnex ra biewnî. Ameyoxa Tirkîya Şirnex de nimite ya. Wayîrvejîyayîşê Şirnex rê, wayîrvejîyayîşê heme şaran rê yo. Ganî rayapêroyî babeta Şirnexî de hesas têbigêro.”