Semedêy biriqyayişê problemêy psîkolojîya şer, lej û pêrodayişan doman may û cenî bi her hawayî heta ke cuyayişê înan bibo bi ey probleman cuyenêy an zî cuyayişê xo vinî kenêy. Semedo ke no psîkolojî wedaryo rayîreke esto, o zî aştî û aramî de wedaryayişê heme dînan o. Homa heq o ra, berê zafêr dînan vejyeno Homa yî. No semedî ra, lazim o her neferê dinyayij bê dîn xo biresno Heq î. Ey demî de heq reseno Heq î û aramî yeno dinyaya weş û geşî.
Semedo ke merdim çîyeke holî ra wedarno lazim o esasê problemêy ke ey çî ra benêy sebep, bêrêy wedarnayişî. Semedo ke domanîy şer vîra bikerêy û her tim cuyayişeke bi aram û aştî de bicuyê, lazim o şerê dinya ser de bîyo û dewam keno kokî ra wedarno. Esas û navika zafêreya şerêy dinya de vejyayê û vejîyenêy, zanîyeno ke dînan yanê bawerîyan ra vejyayo û vejyenêy meydanî.
Tarîxa dinya ra heta ney gamî, kapîtalîzm zafêreya bawerkerdoxêy dînan semedo ke bixapîno her tim bawermendan vera jûbînan dayo. Bawermendan bi mezheban perçe perçe kerdêy ke bezîrganîya xo geş û weş bikerêy. Hetê bînî ra zî kesêy ke verbê înan muhalefet kenêy bêveng veradê ra kapîtalîstan bi plan û projey ke dînan ser de viraştêy şer vetêy. Hinî kerdêy ke muhalefetan zî qirkerdişan ra ravêrnêy ke vengê xo, ters xo, xof xo, xapînayişê xo nêvejê meydanî. Bi no hawayî her tim merdiman vera jûbînan dayê û şer gur kerdêy ke amûrêy çekêy xo yanê sîlehêy xo rotêy û hewna zî wazenêy biroşê zî. Eke ma wazenêy domanêy ma feqîran û medimêy halorteyinan nêmrê se, lazim o ma sifteyî fek dînan ra veradê û bi mezgê xo bi merdimatîya xo, ma xo biresnê Homayê Heq.
Heta ke ma dinyayijîy pey dînan de biremêy û vatişê qûlêy zengînan bikerêy, do domanêy ma şerê qilêrin ya ke kapîtalîzm roj bi roj gur keno de cuyê xo vinî bikerêy û hesrê mayêy ma her tim zey awa Firat û Dîcleyî biherikyo.
Pekî şerî de herî zaf domanêy feqîran çira zirar vînenêy? Domanêy zengînan zey na gamî ne şîyê lejkereyî, ne zî xo kerdêy şerî mîyan. Zey laj û kênekêy serekanêy TC û dewletêy bînan domanêy înan welatêy xerîban de bin banê wendekareyî de nêşîyê û nêşinêy lejkerî an zî welatê xo nêpawenêy. Yanê bi kilmek se beno se, domanêy feqîr û belengazan bi her hawayî zirar vînenayê. Yanê, yê ke şer vejeno ma û pîyê zaf zengînan o, la yê ke şer kenêy domanêy feqîran û belengazan o.
Pekî domanêy dinyayijan çira semedê zengînan mirenêy? Lazim o verpersê no persî her dinyayij xora biperso ke raşteyî bivînêy. Raşte o yo ke, her nefero ke Dinyaya weş û geş ser de cuyenêy, goreya cuyokraştîya dorme û xozaya xo warê eynî heqan êy. Heqê tu zengînî çîno semedê pereyê xo zêd bikero an zî semedo ke bi fikr û zikrê xo bezîrganîya xo avera bibero domanêy feqîran û belengazan bidero kiştiş an zî qirkerdişan ra ravêrno.
Ehmedê BIRA