Yewna het ra YPG/YPJ Maxmûr de, Rabîa de, Deyr Ez Zor de zî bi ruhêko fedayî û enternasyonal, vera DAIŞî şer kerd. DAIŞî; peynî de zî 15’ê Êlule de, vera xo taday Kobanê. DAIŞî Mûsil, çar seatî de û yew demo kilm de Rakka zî girewtbî. Mûsil de, çekî ke destê Ordûyê Iraqî de bî û Rakka de zî çekê giranî ke destê Ordûyê Sûrîye de bî, dekewtbî destê DAIŞî.
Heme hetkarê DAIŞî pabebî ke, Kobanê çend seatan mîyan de bikewo destê DAIŞî. La no waştiş û xeyalî înan veng de vejîya. YPG/YPJ û sîvîlê kobanijan; nê 44 rojî yo ke vera tanqan, topan, fuzeyan û obusanê DAIŞî, bi ruhêko fedaî û qehremanî, newe ra yew tarîx nusenî. Na têkoşîna Kobanî; çar hetê dinya de, vengan da û zerrîya şaranê dinya de cayê xo girewto.
Kobanê, ezberan herimneno. Rojhilatê Mîyanênî de, dîktatorîya nemrûtanê hemdeman rijneno û qilêrîya hezar serran pank keno. Kobanê, çolê mîyan de, se awa cuy û gula wisarî hêvî dano şaranê Rojhilatê Mîyanênî. Vejîya orte ke, DAIŞ heme cayan de, wazeno ke heme kurdan qir biko û kurdan rîyê dinya ra hewano. Hima zî heme cayanê welatê kurdan de, hêrişê kurdan keno. Hima zî bi heme hêzê xo hêrişê Kobanê keno.
Hima zî se ra hîrisê Kobanê deste DAIŞî de yo. Yanî Kobanê ser o hima zî hewro sîya geyreno. Eke Kobanê bikewo, Efrîn û Qamişlî zî keweno. Dima zî ko Kerkuk, Hewlêr Silêmanî û Erbîl zî bikewo. Kobanê vêjdanê merdimanî temsîl keno. Çunku, DAIŞ, wahşet de sîndor qebul nêkeno. Aye ra no dem de vera DAIŞî, yewîya kurdan, gamêka tarîxî (dîrokî) ya. Heyetê Kantonanê Rojawanî û heyete Meclîsê Netewîyê Kurdanê Sûrîye, bi serekîya Mesûtî Barzanî, Dihok de yew kombîyayîş organize kerd. No kombîyayîş de, vera DAIŞî; yewîya xo ya sîyasî û leşkeri û îdarî deklere kerde. No kombîyayîş, ko rayîrê ‘Konferansê Netewîya Kurdan’ zî biako. Na hinê fam bîya ke eke kurdî; heme hewa ra yewîya xo awan nêkî, Rojhilatê Mîyanên de tikê zor wayîrê yew îradeyî sîyasî benî.Welat de û heme dinya de, vera hêriş û wahşetê DAIŞî, kurdî wariştî lingan sîyar. Kurdan hem welat de, hem zî dinya de, hem hetê çalakîyan û hem zî hetê hîsîyatê netewîyî ra, yewîya xo awan kerda. Vera wahşetê DAIŞî serkewtiş; yewîya kurdan ra vêreno.
Eke kurdî, hem çar parçanê welatî de, hem zî dinya de yewîya xo awan bikî û heme hewa ra peştî bidî yewbînan, Kobanê zî xelîsîno. Kobanê azad bo; Efrîn, Cîzîr û Vaşûr zî binê talokeyê DAIŞî ra xelîsînî. Eke Kobanê serbikewo; azadîya Vakur û Rojhilatî ser o zî tesîrê xo keno. Eke kurdî; xo mîyan de, yewîya xo ya awan bikî; aşîtîya Rojhilatê Mîyanênî ser o zî ko tesîr bikî.
Eke bêşert û şûrt, koridor biabo, vera hêz û çekanê DAIŞî, hêz û çeka giran û ardimo însanî şêro Kobanê rê, Kobanê xelisêno. Aseno ke qederê Kobanê; qederê heme kurdan û heme Rohilatê Mîyanênî tayîn keno. Kobanê; vêjdanê merdimanî yo. Wa Kobanê tena nêmano.

Mamoste SILÊMAN