Kurdî çiqasêke biwazê şarê tirkî dir seyjobînan biciwîyê û înan hera xo ser de bihewênê zî her tim rast ro înkar û çinêhesabkerdişê rayedaranê înan ameyê. Vatişêke verînan yê kurdan esto vanê; ‘Yewî da yewî gayke, yew nêaşka bido yewî sayke’ kurdan welatêke xo binê lînganê înan de visto ra la yê nêaşkenê (tehemul nêkenê) binê banê meclisêka xo de ca bidê vengê kurdan. Ma rayêko bîn bî şahid ke ancî heme partîyê tirkan hemverê îradeyê şarê kurdî bî yewî û bi 376 venganê xo destnêdayîşê wekîlanê kurdan dart we. Heme partîyan rengê xo yo raştîn o sîya moşt ra. Ma rayêko bîn dî ke dagirkeran bi (qaşo) çepgirê xo ra bigî heta (qaşo) dîndaranê xo ya hemverê îradeyê şarê kurdî bî yewî û mexsedê xo yo raştîn o hemverê kurdan moşt ra. Wedartişê destnêdayîşê wekîlanê şarê kurdî wedartişê biratîya mîyanê şaran o. Wedartişê destnêdayîşê înan wedartişê îradeyê şaran o. Wedartişê destnêdayîşê înan wedartişê demokrasî û seyjobînanîya mîyanê şaran a. Belkî yê partî û rayadarî wazenê bi nê kerdişê xo şarê kurdî bê veng û bê îrade verdê û înan neçarê xo bikerê la bi raştî no dewr ne dewrê serdemê kanî yo, ne serdemê mîyanînî yo, ne dewrê Osmanîyan o û ne zî dewrê serranê newayan o. Wa nêvacê qey îradeyê kurdan bêro binligkerdişî ko kurdî înan rê sarreyê xo rûnê. Wa nêvacê qey kurdî sîyaset de bê alternatîf bêrê verdayîşî ko neçarê dagirkeran bibê. Eyro meclisê Tirkiya de bîyayîşê vengê kurdan semedê bîyayîşê demokrasî û seyjobînîya mîyanê şaran zî hêvîyêke bi la bi mudaxileyêke nê away darbekarî heme hêvîyê şaran ameyî şiktişî û beno ke no awa verê şarî bido rayîrê bînan. Ko no awa alozî û nanokîya mîyanê şaran de zêde bikero. Ko no awa demokrasî û seyjobînîya Tirkiya rê derbeyêka pîl bo. Sey ke ma zanê bi milyonan şarê kurdî nê wekîlî heme yew bi yew bi venganê xo eşrawitî meclise û eyro roc bi emrê şexsêke û bi pêkardişê çend şexsan no îradeyê kurdan, no vengê kurdan bi rehetî yeno binligkerdişî. Kurdan rayêko bîn dî ke wexta qalê kurdan bêro kerdişî raştî û çepîya partîyanê zîhniyeta pergale nêmaneno û di ê wextî de heme benê faşîstî. Helbet etya ra tepya wazena rayîrê hiqûqî beno wazena ê sîyasî beno ko HDP heme rayîran bicerebno û şarê kirdî zî ko gorey rewşî ra tepkîyanê xo yê demokratîkan bimojno ra. La ne tenê şarê kurdî lazim o ke heme şarê ke na erdnîgarî ser de ciwiyînê hemverê na darbeya saraye vecîyê û saray û rayadaranê aye bîyarê rayîrê şaran ser. Bi nê awayî demokrasî û seyjobînîyêka raştîne mîyanê şaran de bêro rûnayîşî û her şar bieşko bi ziwanê xo û bi rengê xo na erdnîgarîya dewlemende de biciwîyo.
Nesrîn NAVDAR