Eke zewbîn raye çîna, dismen xayino, dismen zalimo, kiseno, qir keno û woxt endî, îmkanê peyendê zewt ken me. Ma rindên raver cirononê xorê, peydona xorê wazen me. Dua qe ken me, raver saba sar dua ken me, peydona xore ken me. Hama ez ewru saba na dewletê zewt kon, saba pîllone na dewletê sêr zewt kon. Hama ewru zewte mi esto. Ez zanon maya mi, piyê mi, cironone ma vatene, zewt meke. Daye kusûrê mide ewru se meke, ewrû zewte mi esto. Memurodiyê, mevacê laze mi, tu ca zewt kena.
Ewru zerre mi dezeno. Ewru zewte mi iye ke domonû kisene, iye ke sûkî vesnene, iye ke kirmoncû qir kene, iye ke mezelone kirmoncu bombe kene, ine re zewte mi esto. Hata nika 54 domon kistî. Beka zafê xebera ma çîna. Her roj sivîlu kisene. Çika kistî, nezan me. Millet sûkî de neşkîno veciyo tever. Kam ke vecîno tever nanepira. Millet veson verdane, awe millet birnene, elektrîk birnene, înternet birnene ke, kes xeberû tever merusno.
Televizyonde sekon? Spîker xeberû dana, vano “terorîstû“ mektep vesna. Ekran de jû filîm muskonno. Cizîr, Sûr, Sîlopî, Nisêbîn, Kerboran wesene, bombe erzene, çeu hard ra kenê ju, serê sûke ra dûî urzenora, adir kuto çeû, çeî vesene. La spiker nevano, vijdone xu nêmendo, ar nêkeno, serm nêkeno, vano mektep vesna. Çimê spîker biye kor, vijdonê spîker biyo kor, biyo xirabin, mordemî na xu kerda xuvîrra, spîker kehrêno, vano mektep vesna. Saba mektep hefe xu yeno. Çê kirmoncû vesene, bombe kerde, biyê xirabîn, domonê kirmoncu kistê, domonê kirmoncû seyî mende, nînê xebere nekeno. Û saba mektep kenrenê. Çê kirmoncû, sûke kirmoncû, domonê kirmoncû qaxûyê inê niyê. Saba inê üzülmüs nebeno. Mordemîn ra, însonin ra qal kenê. Na senê mordemina? Va serê tu mordemîna tu boro.
Zewte mi esto ewru. Kirmoncu, suka inere erzene tever, çê inera erzene tever. Çê kirmoncu riznenê. Neverdane merdone xu bere mezele kere, neverdane, newesone xu bere nêwesxane, neverdane merdone xu busiye. Qeseye esto, vane defe kantarê vijdon xirabê mebo, eke defe bi xirabê, hendî defena ayar neceno. Vijdone na dewletê çîno. Polîs, esker, komandoyî, eskiya ye devlete kute sûkone kirmoncû, qir kene. Beka sima pero verg zanenê. Eke feke verg gina bê gon ra, hendî qe caneverdano, wazeno, perunê qir bikero. Ewru dewleta tirk wazena terê vergî kirmoncû qir bikero. Gona kirmoncû boro. Xû vîrra mekerê, beka ewru sima zaf gona kirmoncû simin ne, hama roje pirnikonê simara yena.
Ewrû zewte mi esto. Ewrû zewte Mirmoncu sima sero esto. Neskînê na zewt ra ver, bixelesiye. Domon seyi mendî. Guna seyû gurona. Sima guno seyû binde bimanê. Haq adirê sima wodaro, haq çê sima birijno. Zilme sima, sere sima boro. Adir va çê sima kuyo, va çê sima biveso.
****
Ez no pira, serd bi
Oxte sond de
Bê oxt, roje biyê tarî
Conê mi bi serdin
Cimê mi kapon bi
Bê hewûn mendo
Ez oxte xode ne merdo
Ez no pira, ebe fantome
Teyna biyo
Nika hîrusû çar biray me
Gona ma kute te horte
Cone mi bi parçe û pirtik
Ne ne qersune nebiye
Fantomu es kisto
Zerre saû karar do
Ez nika parcu û pirtiko
Bojiye mi hete ser
Ninge mi hete ser perray si
Lewe mi de nika
Seyit, Osman, Salih, Usen
Gona mi gine hard
Ju dilope, riye hard bî sûr
Va lanet bo, haq sermaya
Çime xû girotî
Goste mi vesa bira goste mi
Roja zimiston biye
Serd bi,
Cemed guret cone mi
Sewe tarî biye
Mi defena ne diye
rosta roje
Tîja germe
Neskiyo defena çelik û
çolik kayker
Rawu wolaxu de
Ez nopira,
ne be qersune
Fantomu ez kisto
Posta mide jû bidon gaz
Ez zirco
nezon venge mi rest tu
Akse xu da kou
Haq ne esiya pe, lewe mide
Ez hona domon biyo
Des û ponc, sewe biye tari
Mi defena nediye
rosta roje
Germe tîjî
Usen Girmit