Bajarê Meletî se ra 60ê lazimîyê qeysîyanê hîtan, se ra 80ê qeysîyanê wişkan yê dinya pê ano. Berardoxê qeysîyan emser berî ra qet memnun nîyî. Çimkî emser goreyê par berardiş se ra 50 kêmî bîyo û kîloyê qeysîyan par 6 TL bi, labelê emser seba ke qeysîyî tay î bîyo 18 TL.
Berardoxan ra Şenay Gundogdu dîyar kerde ke ê heqê manevî û madî yê keda xo nêgênî û da zanayene ke ancax kooperatîf berardoxan xelisneno. Gundogdu va ‘par ma 12 tonî qeysî ber ardbî, labelê emser pêro pîya tonêk û nîm vejîya û wina dewam kerd: “Emser wexto ke darî vilikî akerdî, zaf varan vara. Mi par 12 tonî qeysî hewana, labelê emser tonêk û nîm vejîya. Qeysîyêke gile ra yena qerfnayene û heta ke yena embarî, zaf kede dîyena. Her merhaleyê qeysîye de etirîyayîş esto. Ma zaf kede danî, labelê ma heqê keda xo nêgênî.”
Gundogdu qala kooperatîfî kerde û wina va: “Nika tena destê ma de qeysîye menda û eke aye zî şêro, çîyêk nêmaneno. Mesela kooperatîfî bibîyênê, heme çî cîya bîyêne. Eke ma berê xo erdanê xo de biresnî û bidî merdimanê xo, ma eşkenî heqê keda xo bigîrî. Coka koperatîf nêbo, nêbeno yo. Pêroyîya Meletî destê 4 kesan de ya. Ganî heme meletîyîjî derheqê qeysîye de wayîrê vatişî bibî. Eke wina bibo, qeysîye xelisîyena.”
Ma zaf zirar kerdo
Cinîya bi nameyê Neslîhan Cengîze zî wina va: “Wexto ke darî vilikî akerdî, zaf varan vara. Emser goreyê parî se ra 50 berardiş kêmî bi. Coka ma zaf zirar kerd. Kesê ke bexçe kîra kerdî, zafê înan zirar kerd. Par 10 tonî qeysîye vejîya û ma 50 hezar TL pere qezenç kerd. Labelê emser ma wina qezenç nêkerd. Ma çîyê ke hêvî kerdî, dest nêvist.”
MA/MELETÎ