ADEM KARAÇOBAN / KOLN
Grûba Tîyatroyî Arêyê Kayî ke bi kirmanckî kayanê tîyatroyî organîze kena, kayêk bi nameyê ‘Bekçî’ bajarê Kolnî yê Almanya de vejîyaye temaşekaran ver. Grûba ke nika gêrayîşê xo yê Ewropa domnena, 2 rojî verê Salonê Tîyatroyî yê Arkadaşî de vejîyaye vernîya temaşekaran û kaya grûbe ke bi 2 ziwanan ameye kaykerdiş, hetê temaşekaran ra zaf ameye ecibnayîş.
Kaye qereqolêk de derbaz bena; cinîyêka extîyara ke ziwan nêzana, tim yena cîrananê xo gerre kena û na extîyare eynî wext de mabênê bekçî û komîserî de tercumanî kena.
Seba ke tayê bihuyî
Derhêner û kaykerê kaya “Bekçî“ Yilmazcan Şareyî va ‘grûba ma 8 kesan ra pê yena, labelê seba ke embazanê ma yê bînan rê vîze nêame dayîş, ma kaye 3 kesan reyde kay kerd’ û wina domna: “Grûba ma xîtabê her kesî kena. Hedefê ma o yo ke mîyanê hende qetlîyam û mergan de ma bişînbî bi ziwanê dayîke şarê xo bidî huyayîş. Ziwanê ma yê dayîke vînî beno û roj bi roje qedîyeno. Xora sebebê awanbîyayîşê grûbe zî no yo.”
Bi ziwanê dayîke viraştişê hunerî
Kayker Musa Oktayî zî va ‘7 serrî yo ke ma na grûbe awan kerda û hedefê ma zî bi ziwanê dayîke kerdişê hunerî yo’ û wina dewam kerd: “Şima zanî dinya de bi her ziwanî huner yeno viraştiş; sînema virazîyena, kitab, şîîr û tîyatro estî. Ma zî seba ke ziwanê ma kewto mîyanê ziwanê vînîbîyayeyan, ma dest bi na xebate kerd. Şarê ma eleqeyêka girde nîşan dano.”
Alternatîfê ziwanî
Kaykeranê cinîyan ra Fîntoz Yildirime zî dîyar kerde ke hedefê înan averberdişê lehçeyê kirmanckî yo û wina va: “Ma wazenî bi ziwanê dayîke mesaj bidî merdiman. Alternatîfanê domnayîşê ziwanî ra yewe zî tîyatro yo. Ma zî hewl danî kay û temayan biresnî şarê xo. Henekêk daxî wexto ke ma bi ziwanê xo bikerî, o beno sebeb ke şarê ma nizdîyê ziwanê xo bibo. Hedefê grûba ma yê esasîyan ra yewe zî no yo.”
Grûba Arêyê Kayî do mabênê 2 û 3ê hezîrana 2017 de bajarê Frankfurtî yê Almanya de kaya xo pêşkêş bikero. Heto bîn ra eynî grûbe do beşdarê Festîvala Dêrsimî zî biba.