Serokê fermandarînê Artêşa Tirk wextê peyinî de, damûsnayinê siyasî kerdî vêşî. Hukumetê AKP"yo ki, îdîa keno peyniyê sîstemê wesayetê artêş ardo û siyasetî ra vista dûrî, vera damûsnayinanê siyasî bêvenga. Serokê fermandarînê artêşa tirk rojanê peyinan de kiştê damûsnayinan dano û kiştê ra bi operasyonan hewl dano demê çareserîn sabote bikiro. Enê hewldanê sabotekarîn ê artêşa tirk jî, badê qisanê Serokkomarê tirk Tayîp Erdogan ê vera demê çareserîn amey. Coka xeylê coşmey vatenanê Erdogan û damûsnayinê artêş, zey peyniyê siyasetê plankerdey hesibinenê.
Ozel vatenanê Erdoganî teqîp keno
Serokînê fermandarînê artêşa tirk mesaja Rayverê Şarê Kurd Abdullah Ocalanî damûsnayinê da û ziwanê heqeretî xeftina. Bado jî Mêrdîn de operasyonê lejkerîn viraşt, demê bêlejînê fîîlî ê serra 2013ê ra na kişt, îhlal kerd. Nay pey ra jî Serokê fermandarînê artêşa tirk Necdet Ozel kovara artêş rê qisey kerd û vat ki, lejê Suriye, têkoşînê vera DAIŞ, meşrûyetê PKK û PYD keno vêşî û vera nay jî ecizînê xo ard ziwan.
Fermandarê tirk vera çeteyanê DAIŞ, çiyê nêvato û ser de jî, mesajê zey DAIŞ qandê înan tehdît û rîsk niyo, dano. Eynî wext de PKK qandê Tirkiye rîsk û tehdît vîneno û vano ki, qandê ewlekarînê sînor, jû tabûra taybet ronê.
HDP mesajê siyasî kirîştî meclîs
Enê damûsnayin û mesajê serokê fermandarînê artêşa tirk rastê nêrazîbiyayinê HDP amey. Wekîlê Serokê Koma HDP Îdrîs Baluken damûsnayin û mesajê siyasî ê artêşa tirk kirîştî meclîsa Tirkiye û wast ki, derheqê artêş de roniştinê taybet viraziyo. Endamanê heyeta Îmralî ra Sirri Sureyya Onder jî nêrazîbiyayin mûsna mesaj û damûsnayinanê siyasî ê serokînê artêşa tirk.
Onder: Artêşa tirk teniya vera kurdan camêrdîn kena
Onder vat, dayinê damûsnayin û mesajê siyasî kar û wezîfeyê artêş niyo û wina dewam kerd: Wexto ki çiwal ant lejkeranê tirk ser, generalê nika qisey kenê, zaf kîbar hereket kerdê. Wexto ki, serokê verîn ê artêş Îlker Başbûg bi sûcê terorîstîn çebiya zîndan vengê xo nêkerd. La belê wexto ki, kurdî benê qala mijar, camêrdîn yena vîrê înan.
NAVENDA XEBERA