ERDEM CAN / ANF/BRUKSEL
Artêşa tirk 34 serrî yo ke vera gerîla de şer kena. Artêşe 34 serrî yo ke bi desan reyan gerîlayê kurdî ‘qedênena’. Yewna rey Serhed de ame dîyayîş ke artêşa tirke şerê xo medya ser ro meşnena û bi no hawa îdareyê fehmî virazena.
Her roje wezîrê şerî yê AKPyî vejîyenî vernîya kamerayan û vanî ‘ma qedêna, nêmendî, cayêko biremî çin o’. Labelê gerîlayan rojanê peyênan de nê vatişanê înan zî orte ra wedarnayo. Bitaybetî gerîlayê Kurdistanî Eyaletê Serhedî de nîşan dayî ke artêşa tirk no şer de çiqas bêçare ya.
Serhed de se beno? Operasyono ke 27ê êlule de dest pêkerd, raştê xoverdayîşo aktîf yê gerîlayan ame. Gerîlayan 9 nuqtayan ra artêşa tirkî hedef girewtî û heta şanî dormeyê leşkeran girewtî. Temamê operasyonê artêşa tirk bi destekê hewa û teknîkî de benî. Labelê ma nê operasyonî de dî ke artêşa tirk nêşena şer bikera. Artêşe erdî ra nêşena aver şêra û wexto ke aver şona zî ma vînenî ke raştê çi yena.
Çend reyî ceribnayî la netîce nêgirewtî
Wexto ke merdim kîte kîteyê çalakîyanê eyaletê Serhedî ra ewnîyeno, vîneno ke operasyon qet netîce nêgêno. Seke yeno zanayîş verê cû zî bi desan reyan bi beşdarbîyayîşê bi hezaran leşker, qoricî û kontrayan operasyonî viraştî. Rayîrî padayî û herêmê biewle awan kerdî. Nê qîm nêkerdî, dêsî viraştî. Waştî yewna rey biceribnî. Labelê netîce goreyê îzehetê Merkezê Çapemenîya HPGyî wina bî: 69 leşkerî merdî, 44 leşkerî birîndar bîyî, 2 helîkopterî ameyî derbkerdiş, 2 wesayîtê leşkerî bitemamî ameyî îmhakerdiş û dest ronîya 1 sîlehê Kanasî, 1 demançe û zaf malzemeyê leşkerî ser de.
Leşkeranê xo ser de gule varnayî
Îzehetê HPGyî de çîyêko tewr zaf bala merdimî antêne, têkşîyayîş ra dima artêşa tirk cenazeyanê leşkeranê xo ser de bi helîkopteran reyde gule varnayî. Xora yeno zanayîş ke verê cû seba leşkerê ke esîr girewtî, vatişê ‘werekna cenazeyê înan biameyêne’amebî vatiş û na reye zî cenazeyê leşkeranê xo ser de gule varnayî. No zî nîşanê ma dano ke artêşe seba ke leşkerî esîr nêkewî destê gerîla, çi destê înan ra yeno, kenî. Xora heme leşkerê ke operasyon de ca gênî, pisporê ke bipere leşkerî kenî yî. Xebera ti kesî mergê nê kesan ra nêbena. Çimkî verê cû nînan reyde peymane yena viraştiş.
Îranî reyde îttîfaq yeno viraştiş
Herçiqas ke hende teknolojîyo averşîyaye destê artêşa tirkî de esto, reyna zî têk şona û Îran reyde îttîfaq virazena. Helbuk medyaya şerî ya taybetî propogandaya leşkeran kena û vana ‘gerîla ver bi qedîyayîşî de yo, nêşeno çalakî bivirazo’. Medya têkşîyayîşê leşkeran sey serkewtişî nîşan dana. Wezîro ke îdîa kerdêne ke do heta 20ê teşrîna peyêne gerîla biqedêno, do vera nê têkşîyayîşî de se vajo. Labelê ganî qet nêro vîrîkerdiş, artêşa tirk wexto ke têk şêro, do vera sîlehan bido merdimanê sîvîlan. Beno ke artêşa tirk nika ra pey hîna zaf hewl bido sîvîlan qetil bikero.