Demêko derg o ke Sûrîye de şero mîyanên esto û tewr peynî Idlib Sûrîye de bîyo cayê munaqeşeyan û krîzo tewr gird ewja de yeno cuyayene. Seke yeno zanayene Han Şehhuno ke sey dekewtişê Idlibî yeno zanayene hetê rejîmî ra destê Heyet Tahrîr Şamî ra ame girewtene û ewja de dengeyî bedilîyayî.
Çimkî ewja de 12 kuleyê şopnayîşî estî û yo 9. de leşkerê artêşa Tirkî estbî. Badê ke leşkeranê rejîmî tîya girewt, dormeyê leşkeranê Tirkî ame girewtene. Idlib de Rûsya û Tirkîya ameyî duştê yewbînan û yeno vatene ke herçiqas ke heta nika Tirkîyaye xeylê muracatî kerdî zî leşkerê Tirkî do esîr bêrî girewtene. Derheqê leşkerê Tirkan ke ewja de yî de çi bîyo, kes nêzano. Labelê ame musayene ke 5 fermandaranê artêşa Tirkî ke yewê înan berpirsîyarê Idlibî yo, îstîfa kerd.
Yeno vatene ke leşkerê ke dormeyê înan ameyo girewtene, beno ke esîr bikewî Sûrîye. Heta nika Tirkîya ra veng nêvejîya. Ame musayene ke rejîmê Sûrîye hewl dano ke leşkerî teslîm bibî. Mabênê leşker û rejîmê Sûrîye de pêvînayîşî yenî viraştene. Na hemleya Sûrîye peymana Astana ke mabênê Rûsya, Îran û Tirkîya de ameybî viraştene zî veng vete. Peymane ra dima Tirkîya ewja de 12 kuleyê şopnayîşî ronayî û nika zî ê kuleyan vînî kena. No het de hewldayîşê Tirkîya ra ti netîce nêvejîyayo.
MA / IDLIB