Artêşa tirkî 14ê Kanûne şewe saet 22.00 de kewte erdê Başûrê Kurdistanî û operasyonê dagîrkerdişî daye destpêkerdiş. Artêşa tirkî bi qorîcîyê Gerdîya qezaya Şemzînanî ra girêdaye dewa Mavanî de sînor derbaz kerde.
Goreyê çimeyanê herême artêşe bi helîkopteran leşkerî ronayî dewa Bermîzeya ke mabênê koyê Sîro û Dîyana de ya. Eynî wextî de teyarayê şerî zî hêrişê koyê Xakurkê, Koyê Avdal Kovî, Sîro û Gelîyê Reşî kerdî û helîkopterê kobrayî zî Deşta Heyate bombe kerdî.
Keso ke dewa Bermîze de maneno û nêwaşt nameyê xo vajo, dîyar kerd ke artêşa tirkî bê xebera PDKyî nêşêna operasyonêko winasî viraza û wina va: “Dewa ma bitemamî dewa PDKyî ya û kontrolê PDKyî de ya. Heta nika dewa ma de çîyêk bê xebera PDKyî nêbîya. Eke xebera PDKyî çin a, ganî reaksîyon nîşan bidî.”
Heto bîn ra ame musayîş ke gerîlayan vera nê leşkerê ke operasyonê dagîrkerdişî kerdî de çalakîye viraştî û netîceyê çalakîya gerîlayan de 6 leşkerî merdî. Goreyê çimeyanê herême gerîlayan xeta Adil Begî de vera leşkerê ke Tepê Xwedê de bî de çalakîyêk viraştî. Herême de firayîşê keşfî û hêrişê hewayî dewam kenî. Reyna ame musayîş ke qerargehê artêşa tirkî ke Amedîye de yo ra Koyê Metîna zî yeno bombekerdiş.
NAVENDÊ XEBERAN