Peynîya weçînayişê 7’ê hezîrane xeyalê AKPe ya îqtîdarî û xeyalê Erdoganî ya serekdewlete zî têk şî. Çi heyf ke têk şîyîşê xo de AKP û Erdogan şarê kurd verpirsîyar vînayî û dijî şarê kurd zî dest pê konseptê şerî kerdî. Peynîya no konseptî zî hetanê nika bi seyan welatijî cuyayişê xo dayî û bi hezaran zî birîndar bîyî. Taybetî Kurdistan de şaristanê ke xorayîrberdişê xo îlan kerdî, bîyî hedefê AKP, Erdogan û dewleta tirk.
Ser Wan de zî dewleta tirk, AKP û Erdogan wazenê konsepteko taybet bişuxilnî. Çarçiweya konseptî de zî polîsê AKP û Erdoganî ra girêdaye her şan de kûçeyê Wanî de gêrenî şarê Wanî provoke kenî. Taybetî polîsê AKPe kûçeyê Wanî de bi wesayîtê Ford Ranger gêrenî û plakayê nê wesayîtan zî ameyî vetiş. Hewna polîsê taybet yê AKPe kûçeyê Wanî ra seba provokeye nuşteyê sey ‘Artêşê Turanî’, ‘Polîsê taybet noca de yo’ û ‘Ma amey şima çinî bikerî’ nusenî.
Ford ranger şuxilnenî
Rojê peynî de Nisêbîn, Sûr, Gever, Cizîr û Rezan de nê wesayîtê Ford Ranger ameybî vînayiş û nika zî nê wesayîtî kûçeyê Wanî de gêrenî û taybetê polîsê AKPe xo ra taxê Îpekolu yê Xaçort, Karşiyaka, Yenîmahalleye û taxê Artemêt ê Şehît Firat û Suphanî hedef girewtî. Saetê şewî de wesayîtê zirxî bi kortejî taxan de gêrenî û vengê muzîkî akenî û şarî provoke kenî. Taybetî mîyanê nê kortejî de wesayîtê Ford Ranger bal ancenî çimkî mîyanê nê wesayîtan de kesekî estî polîs û lejker nîyê, nê kesan taybet teberê Wanî ra amey û navenda kontorgerîlaye ra girêdayî û nê kesan ra taybet pere reyde dijî kurdan şer kenî.
Şar şinasneno
Babete ser hemsereka DBPe Hamîyet Şahîn vat ke taybetî ameyişê komê şerî yê taybet a Wanî, êdî şar bi aşkera hedef o û wina vat: “Çeteyê dewleta tirk serrê 90’î şarê kurd bi wesayîtê Torosan de remnaynê û peynî zî qetil kerdî. Nika zî peynîya konseptê şerî wesayîtê Ford Ranger kûçeyê Wanî de gêrenî. Hema zî dewleta tirk, AKP û Erdogan fam nêkerdî ke bi terteleyan nêeşkenî no şarî nê bitersenî.”
Şarê ma yê Wanî do baldar bibo
Şahîn aşkera kerd ke AKP zey qatilê Sedat Peker Kurdistanî ra eşrawena, êdî şarê kurd do teslîm nêbo, senî ke şarê kurd Cizîr, Nisêbîn û Farqîn de dewleta tirk ra verpers da û şarê Wanî zî nê çeteyan ra do verpers bido.
Şahîn wina peynî kerd: “Lazim o şarê taxê ke polîsê AKPe xora hedef girewtî, zaf baldar bibî. Eke demo ke wesayîtê Ford Ranger a bêplaka vînayî do bi lezî ma ra agahî bidî. Çimkî nê çeteyê zey serrê 90’î şarê sivîl xo ra hedef gênî. Ma do peynîya nê wesayîtan veranêdî. Ma do nê çeteyan ra terteleye nêdî viraştiş.”