Neteweyê Yewbîyaye (NY) bi wesîleya Roja Şaranê Cayî ya Dinya eşkerayîyêk da û dîyar kerd ke zafaneyê ziwanê şaranê cayî bilez raşte ra wedarîyenî û 3 hewteyan de reyêk ziwanêk vinî beno. Her aşme de 2 ziwan vinî benî.
Sekreterê Pêroyî yê Neteweyê Yewbîyaye (NY) Antonîo Guterresî bi wesîleya Roja Şaranê Cayî ya Dinya eşkerayîyêk weşêna û da zanayene ke her 3 hewteyan de reyêk ziwanêko cayî vinî beno. Sekreterê NYyî Antonîo Guterresî dîyar kerd ke her ziwano ke vinî beno reyde hurmet, kultur û tarîx zî raşte ra wedarîyenî.
Guterresî dewamê qiseykerdişê xo de wina va: “Dinya de 90 welatan de 370 şarê cayî cuyenî û tewr zêde polîtîkayê cîyakarî înan ser o yenî domnayene. Şarê cayî se ra 5ê nufûsê dinya yî, labelê se ra 15ê merdiman ke polîtîkayê cîyakarî înan ser o yenî domnayene û tena marjînalkerdişê şaranê cayî de pê yeno. Ziwanê ke her serre raşte ra wedarîyenî, tena hetê kesê ke nêwazenî herra xo biteriknî ra yenî qiseykerdene. Herçiqas ke zafaneyê 6 hezar û 700 ziwanî hetê şaranê cayî ra bêrî qiseykerdene zî her serre bi desan ziwanî vinî benî. Şarê cayî temsîlê 5 hezar kulturê cîya-cîyayan î. Sere de Brezîlya, Kanada, Amerîka û welatê Asya, Afrîka, Okyanûsya û Ewropa wazenî xo bigêrî, bi taybetî seba ke dest ronîyeno serê raşteyanê înan yê cuye tewr zêde înan ser o tehluke esto.”
AMED