Mudirîya DÎSKÎ, çarçewaya Karê Înşaatê Şebekeya Awa Varanî û Kanalîzasyonî de, Cadeyê Musa Anterî, Tekel û Sîpanî yê ke newe bîyê semt û Bûlvarê Firat û Rayîrê Sewrêgi yo kehen de dest bi xebate kerde. Ame aşkerakerdiş ke, na xebate do Tebaxa 2017 de biqedîyo.
15 hezar û 525 metre derg o
Çarçewaya proje de, Bûlvarê Firatî de xebate dest pêkerde. Muhendîsê kontrolî yê Mudirîya DÎSKÎ ra Mahmut Ozdemîrî îzah kerd ke, çarçewaya proje de do 15 hezar û 525 metre dergîya ci şebeke bêra viraştiş.
Ozdemîrî îzah kerd ke kenê ke cayanê neweyan yê ke hema newe bîyê semt de xebata binawanîya awa varanî û kanalîzasyonî biqedînê û wina va “Ma nika Bûlvarê Firatî ser o dest bi xebate kerde. Ma do dima ra Cadeyê Musa Anterî, Tekel û Sîpanî û Rayîrê Sewrêgi yo kehen de dest bi xebate bikerê.”
Berdelê îhale 2 mîlyon û 480 hezar TL yo
Ozdemîrî wina dewam kerd “Çarçewaya proje de borîyê ke verinîya înan 200, 300, 400, 500 ê û verinîya înan 600 mm borîyê korega yenê xebitnayîş. Pêroyî de 1382 metre awa varanî, 14 hezar û 143 metre zî şebekeya kanalîzasyonî yena viraştiş. Berdelê îhale 2 mîlyon û 480 hezar TL yo. Na xebate, par aşma tebaxe dest pêkerdibî û serrêna aşma Tebaxe de qedîyena.”
Izgarayê awa varanî virazîyenê
Heto bîn xebata Viraştişê Izgaraya Awa Varanî ya ke berdelê soznameyê ci 575 hezar TL yo zî dewam kena. Çarçewaya xebate de semedê cade û kuçeyan de arêdayîşê awa varanî 500 heb izgara yenê rakerdiş.
AMED