Kurdistanijan, sûka Fransa Strasbûrg de, ver bana Konseyê Awrûpa de, vizêr destpa nûmayişê ronişten kerd. Nûmayişî de Kurdistanijan, Konseyê Awrûpa ra waşt ke, vera qetlîamanê dewleta Tirk bikewê hereket. Qiseykerdoxê HDK Ertûgrûl Kurkçu, Parlamentera HDP Fîlîz Kerestecîoglu, Hemserokê KCD-E Mûrat Ceylan ra piya 300 sey kes tewrê nûmayiş bî. Kurkçu û Kerestecîoglu nûmayiş de qisey kerdî û hayr antî nûmayişê şarî ser. Kurkçu persa ‘kam terorîst o? Yê ke êrîş kenê, ya zî yê ke xo pawenê terorîstîyê’ kerd. Kurkçu ard ziwan ke, Kurdî ebi tekoşîna xo bî rûmetê pêrokîn dinya. Hemserokê KCD-E Ceylan’î zî vist vîrî ke, heta ke wehşeta ke Kurdistan de ramena nêqediyo, nûmayişê înan dê biramê.
‘Şima zey piyakarê sûc vîneme’
Bi eynî meqsedî sûka Swîsre Cenew de zî, ver bana Jûbiyena Mîletan de, xêm roniya û nûmayişê ronişten destpa kerd. Nûmayişo ke hetê DEM-KURD viraziyena de terora dewleta Tirk yê vera Kurdan amê protesto kerdin.Hemseroka KCD-E Dilşah Osman nûmayiş de qisey kerd û waşt ke, Jûbiyena Mîletan mudaxaleyê dewleta Tirk, ke sivîlan kişena bikero. Osman va, eke şima muxadale nêkerê, ma dê şima zî zey piyakarê sûcî bivînê!. Dilşah Osman tewr peynî de ard ziwan ke, beno ke meşt berey bibo û veng da pêrokîn Kurdistanijanê Awrûpa ke werzê payan û pêrokîn cayî açarnê cayê xoverdayiş.
Sûka Almanya Mannheîm de zî kombiyayişê şarî viraziya. Kombîyayîşo ke bi seyan kesî tewr bî de hemserokê KONGRA-GEL Remzî Kartal qise kerd.
‘Îdareyê xoser do serkewo’
Kartal da zanayîş ke şarê kurdî vera faşîzmê AKP, xorayîrberdişê xo îlan kerdî û bandorkerîya kesêko bîn qebul nêkerdo. Kartal dîyar kerd ke, îradeya xoser do ser bikewo û ard ziwan ke wa şarê kurdî û Hereketa Azadîye na ravêreyeye de xo bi şêweyekê tewr weş motîve bikerhe. Kartal’î hayr ant tecrîdê vera Rayberê Şarê Kurdî Abdullah Ocalan’î ser û destnîşan kerd ke wa çalakî û xoverdayîş bi rihekê seferberî yê şarî bi ser bifino, bêro kerdiş. Kombîyayîş bi qîrayîşê dirûşmê seba hetkarîdayîşê xoverdayîşê Amed û Botan de bi peynî bî.
Antî-faşîstan ra desteg
Sûka Almanya Hamburg de, komek ciwanê antî faşîst ê kurd û almanî, seba qirkerdişê Kurdistanî û tecrîdê ser Rayberê Şarê Kurdî Abdullah Ocalan şermizar bikerî, çalakîya korsan viraştî. Bi qasî 50 kes ver Rote Flora ya taxê Schanzenvîertelê de kom bî, pankart akerdî û bi teqnayîşê fîşekê hewayî dest bi meşyayîşî kerdî. Çalakîya ke raştî eleqeyeke gird ame, hetê polîs û endamê sivîl ê rayvistişê îstîxbaratê Staatsschutz ame şopnayîş. Ciwanî zaf papolanê Schanzenvîertelî de kom bîyî, hêrişê polîsan vera seba ke nîrê girewtiş, mîyanê zaf papolan ra vila bîyî, çalakîya xo bi peynî kerd.
‘Mebi hemkarê qirkerdişan’
Heremê Frîedrîchshafenî yê sûka Bodensee’ya Almanya de, Kurdistanijî û dostê ci qirkerdişê dewleta Tirkiye protesto kerdî. Çalakîya Bochhornplatz de kurd, temsîlkarê sazîyê alewîyan û Partîya Çep ê Alman (Dîe Lînke) hadre bîyî. Vilawekê bi sernameyê ‘Bêveng mevinde, mebi hemkarê qirkerdişan, Kurdistan de qirkerdiş esto’ hetê ciwanan ra ameyî vilakerdiş. Qiseyê çalakîye de vengê xurtkerdişê xoverdayîşî ame kerdiş. Çalakî bi qîrayîşê dirûşmê seba hetkarîdayîşê xoverdayîşan bi peynî bî.
Nûmayişkarî: ‘Kiştox Erdogan’
Peytexta Hollanda Amsterdam de, nûmayişê greê vêşanî yê verra terorê dewleta Tirk 11 rojî ramit. Welatijan nûmayişê xo bi rayşiyîneke qedîna. Rayşiyîn de sloganê zey ‘Kiştox Erdogan, dîktator Erdogan’, ‘Dewleta Tirkî fînanse kena, DAIŞ dana piro’ berz bî.
TJKE: Xoverdayişê xo keme hera
Heta bîn ra Hereketê Cenîyê Kurdî yê Awropaye (TJK-E) veng da Kurdistanijê ke Awrûpa de cuyenî, ke vera terorê dewleta Tirkî û tecrîdê ser Rayberê Şarê Kurdî Abdullah Ocalan’î bêveng nêmanê û tewrê nûmayişanê protestoyî bibê. TJK-E va, vera êrişan bêvengiya Awrûpa ra fehm beno ke, welatê Awrûpa zî hemkarê sûcî yê. Damûstayin de vajiya ke, ‘zey cenîyê Kurd, ma nê polîtîkayanê sazgehanê Mavênneteweyî qebul nêkenî. TJK-E va, „Nika qederê şarê Kurdî reyde yeno kaykerdiş, la ma qebul nêkenî û dûstê nê polîtîkayan ma dê xoverdayîşê xo hîna zaf hêra bikerî.”
NAVENDÊ XEBERAN