Kurdê ke welatanê Awrûpa de cuwyenê, vera qetlîamanê dewleta Tirk meydanan de yê. Kurdistanijê ke ver kêberanê sazgehanê heqê merdiman yê Awrûpa de nûmayişan de yê, vera qetlîaman bêvengiya welatanê Awrûpa protesto kenê.
Nûmayişê ronişten yê Kurdistanijan ke ser vengdayişê TJK-E û KCD-E roja Dişeme ver bana Konseyê Awrûpa, Mahkemeyê Heqê Merdiman yê Awrûpa, Komîteyê Verîgirotişê Îşkence de destpa kerd ramena.
Kurdistanijan bi kampanyaya îmze serpirodayişê MHMA kerdî. Roja Sêşeme bi seyan cenî bi sloganê “Kiştox Erdogan, piyakar Jûyîna Awrûpa” heta bana Mahkemeyê Heqê Merdiman yê Awrûpa ray şî. Ceniyan panqartê zey “Serpirodayişî MHMA kerdî, MHMA red kerd, tewleta Tirk qetilkerd” hewaday. Çarçoweyê nûmayişî de, Kurdistanijan, rîwalê bêvengiya Mahkemeyê Heqê Merdiman yê Awrûpa serpirodayiş kerd.
Serpirodayişê MHMA kerdî
Vizêr zî nûmayişkaran derheqê êrişanê dewleta Tirk û xoverdayişê şarî de panelekê viraşt. Parlamenterê HDP Faysal Sariyildiz zî tewrê no panelî bi, vist vîrî ke AKP Kurdistan de herbekê bê exlaqî ramena û da zonayen ke Awrûpa zî bi bêvengmendiş mesûlê nê sûcan a.
Zey 1940ê Almanya
Sariyildiz’î vist vîrî ke Cizîr de şarî serva erjayê merdimatî xoverdayişekê gird da. Sariyildiz’î da zonayen ke dewlet vera şarî herbê do bê exlaqî ramena û wina va: “Biewnê resîmanê ke Cizîr ra yenê weşînayen. Ferqê ci bi Almanya ya 1940î, Îspanya û Beyrût’a 1970î ra çinyo. Her ca rijnay û veşnay. Dewlet bi nay ra qayil bena, pesnê xo dana.
Parlamenter Sariyildiz’î ard ziwan ke bare herkesî qetlîam de esto û wina va: “Raşto xoverdayişekê gird ame dayen. Şarê ma milê xo çewt nêkerd. Dewlet nêva kal, pîr, genc, cenî û doman, însanan qir kerd. Bodrimanê Wehşetî de însanî amey veşnayen. Rîwalê ke vera na qetlîam ma vengekê bi qûwet nêvet û ma nêşay manî bikerê ma pêrokînî mesûliyê. Welatê Awrûpa zî rîwalê ke bêveng mendî mesûlî yê. Badê panelî bi seyan kes vejiyay teberê xêmî û bi sloganan qetlîamanê dewleta Tirk protesto kerdî.
Çimanê xo megîrê
Nûmayişê Kurdistanijan do heta roja Yewşembe biramo. Zereyê nê roşan de Kurdistanijî dê nûmayiş û aktivîteyê ciya virazê. Herzewbîn babedanê ciya de panelê ciya zî dê heta roja Yewşeme viraziyê. Bi sazgehanê eleqedar ra zî temasê dîplomatîk yê Kurdistanijan dê dewam bikerê. Parlamenter Faysal Sariyildiz zî do bi jew heyetî ra piya Komîseriya Heqê Însanan yê Konseyê Awrûpa de pêdiyayişan virazo.
Bi no nûmayişî ra piya, Kurdistanijî welatatanê Awrûpa û sazgehanê eleqedar ra wazenê ke, vera qetlîamanê dewleta Tirk çim û goşê xo nêgîrê, dekewê hereket û qirkerdişan vindernê.
ANF/STRASBÛRG