Badê bi aşman temaşekerdişê qirkerdişê Kurdan Parlamentoyê Awrûpa are bi. Ronişteno ke roja çarşem netîceyê hewldayen û zoriya siyasetmedaranê Kurdan de viraziya de hayr ant polîtîkayanê qirkerdin yê AKP ser.
Tayn parlamenteran rîwalê bêvengmendişê vera qetlîaman şermê xo ardî ziwan.Parlamenteran aşkere kerdî ke, hikûmeta AKP bi tifinganê giran qeçek cenî, kal û pîran qetil kena. Herzewbîn vajiya ke, AKP Kurdistan açarniya yo gola gonîn. Bin nameyê ‘tekoşînê vera PKK’ de şarê Kurd yeno hedef giroten. Jû parlamenter zî persa ‘domano panc serre senî beno terorîst’ kerd û hayr ant qetlîamanê sivîlan ser. Sermiyanan ardî ziwan ke, Erdogan vera Kurdan sûcê merdimî keno û gerek Mahkemeya Ceza yê Mavênnetewî de bîro dareznayiş.
Hîrê aşmiyo jû artêşa NATO, ebi tanq, top û pêrokîn qûwetê xo, erzena jû şarî ser. Jûbiyena Awrûpa, Parlamentoyê Awrûpa, Neteweyê Jûbiyî, Mahkemeya Heqê Merdiman yê Awrûpa ra piya, pêrokîn sazgeh û rêxistinê heqî û yê sivîlanq qirkerdişê Kurdan ra xo kerdî kerr, korr û lal. MHMA pêrokîn serdayişanê Kurdê ke qetlîaman rî bi rî amey red kerd. Pêrokîn sazgehê eleqedar û yê heqê merdiman goreyê siyaseta corîn hereket kerdî û bêveng mendî. Qûwetanê serdest ser bazareya penaberan , Kurdan çimar ra vet. Eke nika werte de bi seyan merdişî, bi seyan dirbetinî estê se, hendê dewleta Tirk siyaseta corîn yê Awrûpa û sazgehê ci zî sûcdar û mesûlê. Tayn welatî zî rexmê pêrokîn sûcanê merdimî, bi Tirkiye ra piyakariya xo ramenê. Nînan ra jû zî Almanya ya. Hikûmeta Merkel, piyakariya AKP ya bi DAIŞ, kiştişê bi seyan sivîlan, polîtîkayanê qirkerdin yê vera Kurdan yê AKP nêvînayen ra yena, serva menfeatanê xo jû şarî feda kena. Tenya meseleya Kurdan de nê, Awrûpa çimanê xo pêrokîn binlinkerdişê heqanê merdiman ra zî giroto. Awrûpa wayrê akademîsyenê ke haştî waştî û raştê êrişanê nêheq yê îxtidar yenê zî nêvejya.
Siyaset û aqilê serdest yê seserra 20. rameno. Sîstemê kapîtalîzm ke nika zereyê qrîzê do xorîn de yo, serva xelesnayişî Rojhelatê Miyanî de herbî keno xorîn. Hewl dano xo rê cayanê newî akero, pîyonanê newî rono. La jew hesabê şaş yeno kerdiş. Ne Kurdî, ne kî Rojhelata Miyanî zey veriya. Kurdî rexmê pêrokîn êrişanê qilêrîn û polîtîkayanê bêedaletîn teslîm nêbenê. Raşto, bi seyan qeçek, cenî, genc û sivîlan weşiya xo kerdî vinî, la vera zilmê zaliman milê xo nimz nêkenê, welatê xo, kamiya xo, ziwanê xo, rûmeta xo pawenê. Vera no îradeyê şarî artêşa Tirk, NATO û siyaseta serdest rewna ra vinî kerdo. Roj do bîro tenya dewleta Tirk nê, qûwetê ke vera qetlîaman bêveng mendî û wezîfeyê xo nêardî ca, ê dê zî hesabê sûcanê xo bidê.