Rojnameya Azadiya Welat ku ev demeke amadekariyên dema weşana nû dike, di 27'ê Mijdarê de dikeve dema weşana nû. Azadiya Welat heta niha gelek zextan re rû bir û ma. Gelek xebatkarên rojnameyê hatin qetilkirin û niha gerînendeyên giştî, edîtor û gelek xebatkarên rojnameyê di girtîgehê de ne. Azadiya Welat li ser kewneşopiya rojnameya Welat ku di sala 1992'an de li Stenbolê bi heftane dest weşanê kir, weşangeriya xwe didomîne. Rojnameya Welat piştî ku hat girtin di sala 1994'an de 'Welatê Me' bi dest weşanê kir û piştî ku 'Welatê Me' jî hat girtin di sala 1996'an de Azadiya Welat bi dest weşanê kir. Heta 15'ê Tebaxa 2006'an wekî rojnameya heftane weşana xwe berdewam kir û ji wê rojê pê ve rojane derdikeve.

Pêkenok jî dê hebin
Rojname dema dest weşana rojane kir, di destpêkê de 8 rûpel derket û piştre hejmara rûpelên rojnameyê derket 12'an.  Edîtorê rojnameyê Vedat Kurşun ku 166 sal û 6 meh ceza lê hat birîn û piştî ku 4 salan zêdetir di girtîgehê de ma û serbest hat berdan li rojnameyê xebatên xwe didomîne, der barê weşana nû ya rojnameyê agahî dan û wiha got:  Di 27'ê mijdara 2013'an de emê bi 16 rûpelan derkevin pêşberî xwendevanên xwe. Polîtîka û nûçe bibin 2 rûpel. Rûpelek serbest heye û rûpelek jî ji bo dimilkî tê veqetandin. Di dawiya hefteyê de guhertin heye. Dê 2 rûpel bibin rûpela zarokan, yek bibe pêkenok û rûpelek jî ji bo zindanan bê veqetandin."

Rojname dewlemendtir dibe
Kurşun da zanîn ku dê di dema weşana nû de naveroka rojnameyê dewlemendtir bikin û wiha pê de çû: "Pêwistiya rojnameyê bi pêkenok û karîkatûran hebû. Di dema weşana nû de her roja yekşemê, rûpelek me pêkenok derkeve. Cih bidin karîkaturên gel û yên zindana. Me ji bo girtîgehê rûpelek amade kiriye.

Dimilkî dibe 2 rûpel
Sal û nîvek berê pêveka rojnameyê Verroj bi dest weşanê kir û her hefte pêveka dimilkî hat dayîn û heta niha 80 hejmar derketin. Yek jî jê edîtorê rûpela dimilkî Aytaç Durmuş diyar kir ku di dema weşana nû de Verroj dernakeve û dê hejmara rûpelên dimilkî bikin 2 rûpel û wiha got: "Bi derketina Verroj eleqeya ji bo ziman û çandê zêdetir bû. Dê li vir wiha di Azadiya Welat de her roj 2 rûpel dimilkî derkeve.

ÇETÎN ALTUN-ENGÎN EREN/DÎHA/AMED