LEZGÎN AKDENÎZ / MA / AMED
Mabênê tarîxanê 25 û 30ê êlule de Amed de Fuarê Kitaban yê 6. yê Amedî do bêro viraştene. Fuar hetê TUYAPî ra yeno organîze kerdene û do Merkezê Kongre de bêro viraştene. Çarçewaya fuarî de do panel, roportaj, atolye û sewbîna xebatî bêrî viraştene.
Meymanê rûmetinî yê fuarî emser nuştox Migirdîç Margosyan o. Babete ser o Margosyanî qisey kerd. Margosyanî dîyar kerd ke demêko derg ra dima virazîyayîşê fuarî merdimî kêfweş keno û wina domna: “Ez bawer kena ke hetê tewirîye de no fuar dewlemendîyêk bivirazo. Ez wazena no fuar seba Amedî bibo hilmgirewtişêk.”
Margosyanî dewamê qiseykerdişê xo de wina va: “Eke çîyêk nêbo mesela nêvejîyena. Labelê eke çîyêk bibo û bêro înkar kerdene, o wext no beno problem. Welatê ma de problemî nêqedîyenî. Seba ke problemî nînî çareser kerdene, xo dibare kenî. Ganî babeta ma ya esasî wayîrvejîyayîşê mîrasê kulturî yê Amedî ba. Kitabê mi tarîxê nêfermî yê Amedî yî. Amancê kitabanê mi o yo ke vîyarte û nika biresnî pê. Eke ma vîyarte reyde têrî nêmanî, ma nêşênî huzir bivînî.”
Kitabê Margosyanî yê ke Tirkî, Armenîkî û Kurdî ameyî weşênayene, nê yî: Kîrveme Mektuplar, Gavur Mahallesî, Dîcle Kiyilarinda, Bîzîm O Yoreler, Soyle Margos Nerelîsen, Bîletîmîz Îstanbul’a Kesîldî, Tanrinin Seyîr Defterî, Zurna, Kurdan û Çengellî Îgne.