Bahçeli û Erdoğan ra cer Kemal Kılıçdaroğlu

Serokê CHP Kemal Kılıçdaroğlu hete nijadparestiye û faşîstiye ra MHP û AKaPe cevê xora vezeno. Înan ra hebena tuz o. Hen zonena ke namê maya xo Sabiha wa û ebi xo zî anqarayiz o. Eke destebera xo bêro fermanê Dersîm reyna ebi xo dano.
Kemal Kılıçdaroğlu huyrenayîsanê zonê mayan de perverde ser vano: "Zonê mayana de perverde welat keno leteyî.”
Taye anqarayizî bîle vanê: ‘Zonê mayan de perverde jû heq a gune bibo’ hama serokê CHP na heqe seweta Tirkiya jê tehlîke vîneno. Xo înkar keno, ma û piyê xo înkar keno.
Tirkî honde teng nêfikrînê, hama nutikê tirkan jê Kemal Kılıçdaroğlu înan ra zaferî teng û faşîstkî fikrînê.
Ti kam a, kot ra wa, ma û piyê to kot amê dîna, Ataturkê to çi ardo înan ser, reye nînan sero bifikriye, Kemal Beg!
Ero torê torê çi, dismeniya zonê ma, kulturê ma! Ero torê çi letebiyayena Tirkiye!
Fênda to bena fênda kutikê ‘Hayigî.’ Na hêkate kitabê Mîkaîl Aslan Hayig de vêrena ra.
Hêkate niya ra: Eskerê tirkî dewan vêsnenê, dewizê ke wes mendê, barkenê sonê, kutikê verê çeverî teynêbenê, dewe de caverdanê.
Kutik dano xoro vano: "Haw haaaaaw/ez kutikê verê çever yo/wayîrê mi ez caverdu/lopê mi biriyo/qe omirê mi de niyo/ zurbê (garane) vergu bêro, va mi boro..........ez hezar serra ke/seba jû astikê rutî/simarê xizmete ken/sima çitur zerrê nî adirî de/mi caverdanê sonê.....”
Tabî xebera kutikî çîna ke vergî amê dormê ey gureto û se vano pêro gosdanê. Tene waxt ra tepiya eke hebe bî tarî, garana vergu kutîkî cena bena.
Vergode kokim kutik ra niya vano: "Ma amenê dormê dewa sima de bi rocan pîtenê ke pîzê xo mird kerîme, hebe çî fekê nî çelîkanê xo versanîme. To verdenê ma dime hata diyarê kertî. Ti hen sabiyenbe ke qa vatene ma tora terseme. Hama çekê î mirdearu ke nêbiyenê, o waxt to diyenê camerdiye senen a.
Niyade! Tornê Ademî rê xêle heywanî xizmete kenê. Her, astor, miye, ga, pisinge ....qiymetê to honde înan çîno, en milqiyo qefçil bi namê to yeno kerdene, ti onca kutikê verê çever ya vano” vergo kokim û tûyê wertê lîlîka kutikî keno.
Kutik naye ser zerrê xo de vano: "Ya wayîrê ced û celalê mi, destur bide va herd raqilaşiyo, ez tey vînd bî. No sene halo ez tederu!”
Vergo kokim vano: "Heya, ça henî mekerê, ti endî cirê lazim niya, tabî ke to wertê adirî de caverdanê sonê.” Vergo kokim niya devam keno: "Ala reye mira vace/kelpê kutikî/kolê astikê huskî/kutikê verê çeverî/cever ke nêbî/verê çeverî de kutik çîk rê beno.”
****
Endî beso! Nika tam waxt o: Sazî, dezge û rêxistinê ma gune endî tirkî weşiya xora vezê. Rojnamê ma gune pelganê tirkî kêmkerê, televziyonê ma programanê tirkî kêmkerê, siyasetvanê ma eskerakerdîsan bi zonanê kurdistanî bide.