YPG’yê derbarê mijarê de daxuyaniyek nivîskî weşand. Di daxuyaniyê de hate diyarkirin ku li ser agahiya wekî, “komên çete amadekariyên êrîşên li ser herêmên bi ewle yên Rojava dikin’ yekîneyên YPG çalakiyek bi bandor lidar xistiye. Di daxuyaniyê hate destnîşankirin ku çalakî bi hevkariya eşîra Şemer û eşîrên din ên ereb ên li herêmê, di bin navê “tolhildana şehîdên Til Berek û Til Hemîs, şevê din li herêma Tirbespiyê pêk hatiye.

Di berdewama daxuyaniyê de hate gotin ku yekîneyên YPG’ê ji 3 aliyan ve li dijî kozikên çeteyên DAIŞ, Cephet El Nusra û Ehrar El-Şam çalakiyek bi bandor lidar xistiye û wiha hate domandin: “Çalakî ji aliyê herêma di navbera gundê Hedad û bajaroka Ceza ya li nêzî sînorê Iraqê, herêma di navebara Til Koçer û Ceza û xeta di navbera gundê Til Elo û Ceza de pêk hat.” Derbarê encamên çalakiyê de jî di daxuyaniyê de ev agahî hatin dayîn: “Di çalakiyê de yekîneyên me bajaroka Ceza û gelek gundên li van herêman ji çeteyan rizgar kirin. Her wiha 2 doçkayên 12.7 û 14.5, arpîciyek, 6 kelaşnîkof, yek BKC, 5 wesayît û gelek cebilxane hate desteserkirin. Dîsa bi dehan kuştiyên komên çete hene û 3 cenaze di destê yekîneyên me de ne.” Di dawiya daxuyaniyê de hate gotin ku YPG kîjan hêz dibe bila bibe, dema hewl bide ku êrîşî herêmê û ewlekariya gel bixe talukeyê, ew ê wekî mertal li dijî bisekinin û heta ku herêm ji komên çete xilas dibe, wê çalakiyên wan bidomin.

TIRBESPIYÊ