Serdozgerîya Komare ya Xarpêtî derheqê parlamenterê HDPyî yê Amedî û Endamê Heyetê Îmrali Îdrîs Balukenî de seba ke Kongreya 2. yê Rêxistina Bajarî ya Xarpêt de qisey kerdbî, derheqê ci de îdîaname amade kerde. Yeno zanayîş ke Baluken yewna doze ra 4ê teşrîna peyêne de amebî tewqîfkerdiş û nika Hepisxaneyê Tîpa F yê Kandira de maneno.
Badê ke destpironêginayîya parlamenteran 20ê gulane de ame wedarnayîş, fezlekeyêk derheqê Balukenî de erşawîyaybî Xarpêt. Îdîanameya ke hetê Mehkemeya Cezaya Giran ya 2. ya Xarpêtî ra ameya qebulkerdiş, bi îdîaya ‘propagandaya rêxistine’, ‘pesindayîşê suc û sucdarî’ û ‘tahrîkerdişê şarî’ seba Balukenî heta 10 serrî cezaya hepsî ame waştiş.
Qala Ocalanî kerdiş, suc hesibîya
Goreyê îdîaname, qiseykerdişê Balukenî de qala ‘mîraso ke Şêx Seîd û Şêx Şerîf ra heta Seyîd Rizayan ameyo û tewr peynî Hepisxaneyê Amedî de Mazlum Doganî dewre girewto’ sey suc ameyo hesibîyayîş. Reyna seba ke Balukenî vatişê xo de qala Rayberê Şarê Kurdî Abdullah Ocalanî kerdo, o zî suc hesibîyayo.
Mehkeme do roja 21ê kanûne roja çarşeme Mehkemeya Cezaya Giran ya 2. ya Xarpêt de bêro dîyayîş.
DÎHABER / XARPÊT