Roniştişê dawaya Parlamenterê HDP û endamê Heyetê Îmrali Îdrîs Baluken Mahkemeya 8. ya Cezayê Giran ê Amedî de amê vînayen. Baluken bi behaneyê "şikê biquwet ê sucî esto" nêame texlîya kerden.
Roniştişê 4’în ê dawaya Baluken o ke 4'ê Mijdara 2016’î de ame tepiştiş û bi waştena 18 serrî cezayê tepiştişî yeno mahkemekerdiş amê vînayen. Parlamenterê HDP Feleknas Uca, Sîbel Yigitalp û Ziya Pir ra pîya endam û rayveberanê HDP û malbata Balukenî roniştiş taqîp kerd. Dozgerî qerarê xo wend û waşt ke Balûken bi tepişteyî bîro mahkemekerdiş.
‘Komkiştena sîyasî ya’
Pawitox Rehyan Yalçindag, dîyar kerd ke derheqê muwekilê ci de ti delîl çin a û no operasyonêko sîyasî. Yalçindag vist vîrî ke bi sebebo ke muxalif ê hiqûqa awarte vera înan de yena kararden û va: “Vera sîyasetmedaranê kurd komkiştena sîyasî yena ramiten. Na dosya bi temamî zûrî û zanayîşanê pûç ra ca yena. Goreyê xala 83'în ganî heqê muwekilê mi bîro dayen. Do qerar DMME vejero û ma do pîya netîceyê ci bivînê.
Pawitox Mehmet Emîn Aktarî zî ard ziwan ke dadger derheqê wekîlan de qerarê veradayîşî danê, la dozgerî îcadek newî peyda kerdo û îtîrazê dozgeran ra dima wekîl dibare ameyo tepiştiş û wina va: “Na raybaza dozgeran hiqûq de çin a. Kamî nayî îcad kerdo, dîyar nîyo. Tewr peynî de deheqê siyasetmedar Firat Anli de qerareke winasî ame dayen.
Pawitişî ra dima, heyetê dadgeh ser waştena dozgerî fina derbarê Balukenî de qerarê texlîya nêda û bi behaneyê "şikê biquwet ê sucî esto" qerarê bi hawayê tepişteyî mahkemekerdişî da.
DÎHABER/AMED