Kitabê Ocalanî ke çarnîyayo ziwanê Îspanyolî badê Amerîka ya Latîn, Arjantîn, Bûenos Aîres, Brezîlya, Ûrûgûay, Paragûay û Şîlî nika kî Îspanya de yeno dasilasnayen. Kombiyayişê dasilasnayişê kitabo ke çarnîyayo Katalankî û Îspanyolkî Barcelona de destpa kerd. Kombiyayişo ke hetê Weşanxaneyê Descontrol Edîtorîal, Colectîû Baûma û Platformê Poştdayenê Kurdistan (AZADÎ) ame organîzekerden La Casa de la Solidarîtat de (Navendê Poştdayene) de virazîya.
Kitabî de pêşnîyazê çareserî estê
Azayê KNK û açarnayoxê kitabî Mahmût Çolak Zerdeştî, ser nameyê Weşanxaneyê Descontrol Edîtorîal Hector Clerîs, ser nameyê Colectîû Baûma Lola Varlîn ra pîya xêlê kesî tewr bî. Kombiyayiş de Roja bîyayişê Şoreşgerê Enternasyonalîst (14ê Hezîran 1928) Ernesto Che Guevara zî bimbarek bî.
Hector Clerîs ke kombîyayiş de qisey kerd vist vîrî ke fikrê Ocalanî eleqeyê înan ancenê û cok ra înan kitab çap kerdo. Clerîs da zonayen ke kitabî de serva ravêrnayişê probleman pêşnîyazê çarekerdişî estê. Clerîs aşkere kerd ke perspektîfê Konfederalîzmê Demokratîk eleqeyê înan ancena û da zonayen ke hereketê şoreşger êşkenê no kitabî ra xêlê feyde bivînê.
Çare Konfederalîzmê Demokratîk o
Azayê KNK û açarnayoxê kitabî Mahmût Çolak Zerdeştî zî hayr ant teorîya Konfederalîzmê Demokratîk, Jîneolojî û Şoreşê Rojawa ser. Zerdeştî derheqê netew-dewlet û Konfederalîzmê Demokratîk de fikrê Ocalanî bi nê vatenan ard ser zon: “Bi sîstemê netew-dewletî ke di sey serranê peynî de ronîya ra pîya dûştê şaran polîtîkayê çinîkerden û qirkerdenî kî destpa kerdî. La endî rojanê ewroyî de no sîstemî îflas kerdo û endî nêşkeno hewcedarîyanê şarî rê bibo cewab. Ganî dûştê nayî de Konfederalîzê Demokratîk bîro ciwiyanî kerden. No sîstem pêrokîn şaran rê firsetê pîya û azad ciwiyayişî dano. Rojhelata Mîyanî ya ke xêlê problemî estê de çarekerdiş sîstemê Konfederalîzmê Demokratîk o.
Zerdeştî qiseyanê xo de hayr ant tekoşîna serbestî yê cenîyan ser zî û vist vîrî ke taritîya Rojhelata Mîyanî de cenîyê kurd duştê barbarîzma DAIŞ tekoşîn danê. Zerdeştî va, eve na tekoşîn cenîyê kurd pêrokîn dinya de bîyê nîmûne û aşkere kerd ke cenîyê kurd no quwetê xo sosyolojîya cenîyan yê Ocalan’î ra gênê.
ALÎ GULER/BARCELONA