Partîya Haştî û Demokrasî (BDP) ke 2008î de ronîya, 2014î de nameyê xo vûrna û bi Partîya Demokratîk yê Hereman (DBP) rayîra xo de dewam kerd.
DBP ke bi mekanîzmaya cêr ra hetê cor xo rêxistin kena ebe projeyê demokratîk, ekolojîk û azadîwaştîya cenîyan û bi sîstemê hemserokîn kewt weçîntayinanê 30ê Adar 2014î bi serkewtişeke gird vejîya. DBP nê weçîntayinan de sûkê pîl, sûk, qeza û beldeyan ra pîya 101 şaredarî qezenç kerd. Badê weçînayinan hemşaredarê DBP her ca de goreyê hewcedarîyanê şar destpa viraştişê proje û xîzmetan kerdî. Xêlê sûkê ke heta nika hetê sîstemanê rejîm xîzmet nêberdîyo de xêlê gureyînî amey ramitene. Çike nê partîyan şaredarî tenya goreyê menfeatê xo şixûlnayê, hewcedarîyanê şarî rê nêbîyê cewab. Hewna bi hezaran rayê dewan çinî yê. Problemê aw û ceyranî yenê anten. Pakkerdişê çorme ra bigîrê heta xîzmetê perwerde, weçî ûsb. de xêlê problemî estê. La hemşaredaranê DBP bi tespîtkerdişê problem û hewcedarîyan destpa kar kerdî û goreyê hewcedarîyan gam eştî. Rîwalê nê xîzmetan şar bi şaredarîyanê xo ra qayil û şa yo.
Şaredarîyê DBP zî rîwalê enê gureyîn û serkewtişanê xo bî hedefê hikûmet û dewlet. Sermîyanê dewlet û çapemenîya ci ya hetkar dûştê şaredarîyanê DBP de jû fekî ra destpa propagandayê sîya (reş) û krîmînalîze kerdî. Verîya nika zî walitîyan rê fermanê ‘Îdareyanê heremî quwet ra bivist nê’ rûsnayî bî. Peycoy gureyînê şaredarîyan roj bi roj amey manîkerden, hemşaredar û gurekarê şaredarîyan jû bi jû amey binçimkerden û tepişten. 21 hemşaredarê DBP rîwalo ke xîzmetê şarî kerdîyê nika tepişte yê. 30 ra vêşî hemşaredarê na partî zî wezîfe ra ameyê girewten. Nika zî pêrokîn şaredar û hemşaredarê DBP bi tehdît, zorvajî û zextanê dewlet ra rî bi rî yê. Reîscûmhûr, Serokwezîr û xêlê îdarekarê dewlet eve tehdîtê ‘ma dê kayyûm bierzê, ma dê dest ronê şaredarîyanê DBP ser’ mudaxaleyê îradeyê şarî kenê.
Nê sermîyanê dewlet îdia kenê ke ‘şaredarîyê DBP poşt danê PKK, ci rê perre rişenê!’ Serva ke nê îdiayanê xo îspat bikerê û DBPyijan ‘ser sûcî de bigîrê’ mufetîşî risnayî şaredarîyan. La mufetîşê ke jû serrî yo şaredarîyan de teftîş kenê ‘sûcekê’ nêdî. Mufetîşê ke nêwaştî bi destê veng (tol) ageyrê Enqera bi behaneyê ‘mewzûatê qanûnî’, ‘karê bêqanûnî’ ûsb. her çî kerdî rapor û zey ‘sûcî’ damûsnay.
Îxtidara gonîn badê hewldayenê wedarnayişê ‘heqê destnêdayişî’ yê parlementeranê HDP nika zî verê xo da DBP. Esasî de hedef şar bi xo yo. Êrişê dûştê HDP û DBP zî leteyê ‘Planê Şikitenî’ yê. Şarê kurd û yê azadîwaştî vengê xo, waştenanê xo, îradeyê xo HDP û DBP de temsîl kenê. Nika raya dîktatorîn yê Erdogan û AKP de HDP û DBP barîqateke gird ronayo. Heta ke nê hurdî partî bibê Erdogan nêşkeno plan û projeyanê xo bivistero pratîk. Nayî ra nika hewl danê kê nê hurdî partîyan werte ra wedarnê.
Jew sebebo bîn ê êrişkerdenê DBP zî no yo ke; Şaredarîyê DBP zey zihnîyetê klasîk yê partîyanê sîstemî nînê îdare kerdene. Bi kiltûrê demokrasî, ebe qerar û waştenanê şarî ra pîya yenê îdare kerdene. Bi fermanê corî ra nê, bi îradeyê cêrî ra pîya, yenê îdare kerdene. Dûştê îdareyanê camêrdîn yê sîstemî, bi îradeyê têdûşt yê cenî û camêrdan, bi sîstemê hemserokîn yenê îdare kerdene. Bi no şiklî şaredarîyê DBP sîstemeke alternatîf ronenê û xîzmet kenê. No alternatîf zî AKP û partîyanê bîn yê dewlete tersneno.
Bi vatişê kilmek, HDP û DBP garantî û kilîtê haştî û demokrasî yê. Dûştê faşîzmî de barîqatî yê. Ganî şarê kurd ra pîya pêrokîn weçîntoxê hurdî partîyan wayrê îradeyê xo bivejyê û barîqata dûştê faşîzmî hera bikerê.