Ewro 8 Adarî yo. Roja Cinîyan o. Ez 8 Adarî yê cinîyan pîroz kena. Wexto ke vanî 8 Adarî cinîyê kurd yenî vîre herkesî. Ayê 8 Adarî kerd rojêk rastîn cinîyê kurdî yê. 8 Adarî de cinîyê ke dinya de vejîyenê meydan, pêronê hûmarê ayê cinîyan kom bibo, nêbeno qasê cinîyanê kurdan. 

Cinîyê kurd rehet bi rehet nêameyê na merhela. Rebêr APO deqîqe bi deqîqe, helm bi helm, roj bi roj, aşm bi aşm, serr bi serr cinîyê kurd zana kerd. Rêxistin kerdî. Kerdî şervan. Kerdî sîyasetkar. Kerdî têkoşer.  Têkoşerê sey Berîtan û Zîlan înan vejîyayî. Kerdî hunermend. Hunermend Şehît Mîzgîn vejîya. Cinîya kurd pê xebatê Rebêr APO hina bî. Dinya de veng da. Nika herkes bi hurmetî nêzdîyê cinîya kurd beno. 

Herkes qalê şervanê YPJ, YJŞ, gerîlayê YJA-STAR keno. Medya dinya de ser nê têkoşeran her roj nêbo her hefte, her aşme de yew bername esto. Nê têkoşerî senî şer kenî, senî ciwîyenî, senî fikir kenî? Cesaretê înan senîna? Arîn Mîrkan senî bî fedayî ser ayê vindenê. 

Wexto ke dinya hina ser cinîyê kurd vindena, di hêz nê çîyê re qayîl nêbenê. Her di hêzî Şoreşe Rojawa ra nat bîyê yew, pîya bîyê hembere şarê kurdî şer kenî. Nê hêzî dewleta tirk û Barzanî-KDP’yî.

Her di hêzî zî hemberê cinîyê kurd heqeretî kenî. Xora dewleta tirk cenazeyê cinîyê kurd yê YJA-STAR û YPS’yîyan mojnena, teşîr kena. Pê na tewirî wazena şerê taybet biramo. Dewleta tirk hina kena herkes fam keno. La eynî çîyê Barzanî-KDP’yî zî kenî.

Medyayê KDP her roj ser cinîyê kurd yê têkoşer yew hayîyê zurrî vila kena. Vana PKK hina hina keynanê Kurdê Êzîdî remnena. Pê şerê taybet wazena tesîrê xo ser Kurdê Êzî bikero. Cinîyê kurd têkoşîn ra dûr bivisno. 

Nê KDP’yîyan ra yew zî pêşmerge yo bi nameyê Serbest o. Serbest o ke 5 hezar keyna û cinîyê kurd 3ê Tebaxe 2014 de teslîmê çeteyanê DAÎŞ yê tirkan kerdî. No keso ke hesabê nê sûcan nêdan o, ser ra zî Kurdê Êzîdî ra vano, ‘wa keynayê şima beşdarê YBŞ nêbî. Xo nêpawê.’ PKK zî sucdar keno, vano çira keynayê kurd kena wayîrê hêz û çek. 

Kesê sey Serbestan teqenî.  Cinîyê kurd yê wayîrê cesaret, fikir û hêz ra tersenê. Zanî rojêk cinîyê kurd Serbestan-Barzanîyan û pêronê KDP’yîyan ra hesab pers bikerenê. Qey ayê zî har bîyê.

Fek erzenî PKK û cinîyê kurd.

La sebikerenê felatê înan çîna. Do cinîyê kurd înan ra hesab pers bikerenê.