Beno ke no sernuşte tayênan biqehrno, tayêna mat biverdo la ez îdia kena ke Barzanî kurd nîyo. Tu eleqeya Barzanî bi kurdîtîye ra çîn a. Ne aqlê Barzanî, ne zerrîya Barzanî, ne royê Barzanî, ne hişmendîya Barzanî, ne exlaqe Barzanî kurd nîyo. Barzanî nîyetê xo de kurd nîyo. Nîyetê Barzanî dişmenê kurda yo. Yê Barzanî tenê pratîkê ey nê nîyetê ey dişmenê kurda yo. erdoxan, dewlet baxçelî ûsî çiqas dişmenê kurda yê Barzanî kî hende dişmenê kurda yo. Barzanî dilqê kurda de dişmenê kurda yo. xo kerdo dilqê kurda dişmenîya kurda keno. Kanê vanê ya qralî ra qralêr… dişmenîye de kewto pêşbirke. Adeta dişmenanê kurdan ra vano vindêrê ez şima ra dişmenêr a.
Kurdî komelêdê yê neolîtîkî yê. Kurdî awakarê kulturê neolîtîkî yê. Komelê neolîtîkî komelê kulturîyê. Kulturê neolîtîk hem bi nirxanê xo yê madî hem kî yê manewî mordemîye lawnaya, kerda girs. Axlaqê kulturê neolîtîkî exlaqê azadî û pêropîyayî yo. Kulturê neolîtîkî desthilatdarîye, zulm, zordarî, tebaqabîyene ra guretîyo. Dîktatorî, desthalatdarî, tebaqeya cor û cêrî çînê kulturê neolîtîk de. Kuturê cinî yo. Nerm o, nêkîşeno dano cuyene, par keno, têduşt o, keno weyî.
Her çiqas bi hezar serra yo desthilatdarî cad kenê ke nê kulturî mîyan ra rakerê kî pê nêşkînê. Şarê kurd û şarê bînî hîna bi nê kulturî cuyenê. Kurdî afîrînere nê kulturîyê, no kultur zaf xorîn cuyayo. Sebebê awanekerdena dewletên zaf merkezî ya kurdan o sereke no yo. Kurdan zanayo ke eke bibê dewlet ê azadîya xo dest ra bidê. Azadîya xo vîndî bikerê. Aye ra kî dewletê ke awan kerdê pêro dewletê zaf merkezî nîyê zîyaderî konfederasyon ê.
De şima bêrê gorê nê exlaqî Barzanî muqayese bikerê ka tu eleqeya Barzanî bi kurdan ra esta ya çîn a. Eke Barzanî kurd bîyênê dewleta tirk a ya ke bi serra yo deşmentîya kurdan kena, seba ke kurdan mîyan ra rakero çi dest ra êno kena ra têkîldar nêbîyênê. Ey şarê kurd bipawitênê. Bazaranê qefçil de şarê kurd û Kurdistan nêrotênê.
Desthilatdaran Barzanî erkdar kerdo ke Barzanî Kurdistan de bêexlaqîye raverbero. Tenê nê çend babetanê pêyênan de ma nîyadîme ma bivînîme ke çiqas bê exlaq o. Çiqas bê exlaqîye de sîndoran nas nêkeno. Çeteyanê Barzanî Hevala Nûjîyan bi taybet xo rê kerde hedef na piro. Destê hevala Nûjîyan de kamera estbîye. Çeteyanê Barzanî bi suîkast aye kişt. Xo ra Barzanî bi taybet rojnamevanan kîşeno. Kiştoxê rojnamevanan o. Serra vîyarte de bi desan rojnamevanî kîştî. Çira rojnamevanan kîşeno? Hende qefçil o ke nêwazeno rojnamevanî qefçilîya ey vecerê orte. Hende tarîyo ke roştîya rojnamevanan ra terseno.
Çeteyanê ey cinîya bi nameyê Nazê ya bê çek e, şehîd kerde, ser de wuşt ra bêexleqîya tewr girse kerde va ‘asayîşê êzidîyan a kîşta.’ Her çî verê çimanê di hezarî ra zîyaderî însanan de qewimya. Şikîya verê dihezar çiman de zurî bikero. Çeteyêk xo qirîzê zerrî derbaz kerd merd va PKK kîşto. Nimuneyê sey nînan zaf ê. Eke merdim biwazo binusno ez bawer kena pelî bes mekerê. Tawo ke merdim pêro kerdenanê Barzanî de nîyadano çîyo ke sereyê merdimî de virazîno merdim vano nêbeno ke no kurd bo. Vanê sînorê îxanetê çîn o la qey Barzanî mîsyonerê tayê dewleta yo ameyo kewto Kurdistanî hemverê kurdan bi her usulî şer keno. Exlaqêdê şerî kî esto. Barzanî de exlaqê şerî çîn o.
Peyê terteleyê êzidîyan ê 73. hîna xo sey dostê êzidîyan musneno. Rastiye de Barzanî êzidiyan ra nefret keno. Çunke xeta Barzanî xeta îslamê sûnî ya muavîyî ya. Nika pêro sîyasetê xo yê qefçilî seba ke kurdan bi taybetî êzidîyan mîyan ra rakero keno.
Seba nê rastiyan gereke şarê kurd û bi taybet êzidî êdî bi Barzanî mexapîyê. Barzanî kurd nîyo, dişmenê kurda yo. Na rastiye her ke şono hînî zîyade zelal vecîna mîyan û do vecîyo.