Sîyasetvananê başurê Kurdîstanî omidê xo xora birrno, dugelanê NATO ra çekan pînê. Verva DAÎŞ pêronêdanê, vanê: “Ap Hans yeno ma xelesneno.’ Na mavên de dergusa dugelanê NATO, DAÎŞ, hem Iraq de hem kî Suriye de qetlîamanê xo ramena. Rojava de YPG û YPJ, Başur de kî YPG, HPG û YJA STAR verva garana qetilkaran danê pêro. Sîyasetvanê Başurî herdê xorê wayîr nêvejînê. DAÎŞ amo verê pirnike de ziq biyo, siyasetvanê Başurê kewtê zerrê xeyalanê xorî, hewnê “Ap Hans” vînenê. “Ap Hans” kî gilê koyêde berzî ra nîşto ro, fîlmê trajediyê kurdan de niyadano.
Obama nêwazeno tewa bikero. Gorê hukumatê Obama, DAÎŞ seweta Amerîka tehdît niyo û na saete verva dugelanê NATO serestîsan plan nêkeno. Nî vatîsî yê mi niyê, yê wezîrê Amnerîka yê. Gegane vajîno ‘Teyarê Amerîka DAÎŞ bomba kenê” la raştiye de Amerîka se kena, kes nêzoneno. Eke Amerîka raşt DAÎŞ bomba bikerdenê, nika Iraq xeleşayî bî. Hen osenoke Amerîka wazena seweta DAÎŞ raya Rojavayî rakero. Qetlîamê DAÎŞ yê Şengal ser ra ha wa asme vêrde ra, la DAÎŞ hona Şengal dero. Pekî na pirodayîsê Amerîka kotî yo? Hen oseno ke Obama na derheq de vatîsan ra dot nêsono û waxt rê kay keno. Pê waxtî se keno, o kî araze niyo. Yeno famkerdene ke yê dugelanê Rojavayî seweta ci dayena serbestiya kurdan onca niyetê xo çîno. Naye kî xo vîra mekerîme: DAÎŞ dest de çekê Amerîka, jê Humvees û tanqê Typ M1 Abramsî estê.
Almanya wazena kurdanê başurê Kurdîstanî rê çekan birusno. La çekanê kanan. Bi taybetiye roketê Mîlanî rojdemê Almanya derê. Nî roketî kan yê û waxtede verva tanqanê Sovyetî hetê rojhilatê dugele de ameyî bî cakerdene. Serranê 1970 de virajiyê. Endî kan yê, kar ardena xo kî zor a. Arteşa Almanya dest de roketê neweyî û modernî estê, wazena nî roketanê kanan serê xora def kero. Waxtoke Almanya nî roketan bierzo çop, ceremê xo zaf berz beno, eke birusno başurê Kurdîstanî, na bar ra xeleşîna. Yanî Almanya başurê Kurdîstanî jê çopxane vînena. Heto bîn ra hata nika kî hona nî çekî başurê Kurdîstanî nêrestê.
Îtalya kî wazena çekan birusno Başurê Kurdîstanî. Nî çekî, leto jede tifongî yê û Almanya de amê virastene. Cira vanê “Birrakê Hîtler.” 1942 de Herbê Dîna yê 2îne de arteşa Hîtler ardê kar. Almanya nî tifongî serranê 1960 de rotê Îtalya. Îtalya kî na çopê xo nika kurdan rê kena halete.
Yeno vatene ke Fransa kî wazena çekanê qickekan birusno. Hona tam zelal niyo, hama hen oseno ke Fransa kî wazena çopê xo birusno Başurê Kurdîstanî. Kurdî besenêkenê bi nî çeken verva DAÎŞ serkuyê. Dugelê NATO nêwazenê çekanê giranan û modern bidê kurdan, çike dostê xo Tirkiye kî nêwazena. Nî dugelî wazenê seweta çekanê newu ambaranê xo tol kerê. Na semed ra başurê Kurdîstanî rê patpatikî û kan-kun yenê rusnayene.