SELMAN GUZELYUZ / MA / AMED
Çend rojî verê Stenbol de kombîyayîşêk ame viraştene û Tirkîya, Rûsya, Fransa û Almanya beşdar bîbî. Kombîyayîşî ra dima vera Girê Spî û Kobanê de hêrişî dest pêkerdî. Hetkarê Hemserekîya HDPyî yê Têkilîyanê Teberî ra Berpirsîyar Hişyar Ozsoyî ê kombîyayîşî ser o qisey kerd.
Ozsoyî va ‘Amerîka dîyar kena ke înan bi Tirkîya reyde qisey kerdo’ û wina domna: “Labelê heta nika vernîya hêrişan nêameyo girewtene. Xora Tirkîya goş nêdana reaksîyonanê Amerîka. Beno ke Tirkîya nê firsendî biaçarno dagîrkerîye. Eke reaksîyon nêro nîşan dayene, Tirkîya do Kobanê dagîr bikero.”
Ozsoyî dewamê qiseykerdişê xo de wina va: “Polîtîkaya Tirkîya îflas kerda. Tirkîya verê cû seba Sûrîye vatêne ‘Do Esad şêro û Sûrîye de destûr nêdîyo statuyê kurdan’. Labelê nika bi temamî hewl dana Rojawanî çinî bikera. Eke Tirkîya ewja dagîr bikero, heme xebatê ke Amerîka heta nika kerdî, do veng ra şêrî. Amerîka ewro hem seba ewleyîya Israîlî û hem zî seba ke tesîrê Îranî kêmî bikera, polîtîkaya xo ya Sûrîye dîyar kena. Cok ra mumkin nîyo ke Amerîka leşkeranê xo Sûrîye ra bivejo. Çimkî eke vejo, herême Îran rê manena.”
Ozsoyî qiseykerdişê xo de qala muhîmîya kurdan kerd û wina qedêna: “Eke Tirkîya mudaxaleyê Vakurê Sûrîye bikera, o wext ê ke qezenç bikerî DAIŞ, Esad, Îran û Rûsya yî. Cok ra ganî Amerîka vernîya ci bigîro. Sûrîye de 2 mîlyon û nîme kurdî estî. Cok ra ganî kurdî mîyanê Sûrîye de cayêk de ca bigirî. Yanî sîstemo ke kurdan nêhesibno bironîyo zî nêşêno estena xo bidomno.”