Selahattîn Demîrtaşî ke “Cepheyê Demokrasî” ra xerîtaya rayî pêşnîyaze kerd û vist vîrî ke çarekerdişê meseleya Kurd de ti cidîyetê cigêyrayîşanê ke Birêz Ocalanî û PKK çin hesibnenê çin o û samîmî nîyê.
Hemserokê Pêroyî yê HDP Selahattîn Demîrtaş ke Girotxaneyê Tîpa F ê Edîrne ra seba rojnameyê Ozgurlukçu Demokrasî bi nameyê “Cepheyê Demokrasî” nuşteyeke ruşna de hayr ant qewimyayîşanê sîyasî ser.
‘Rejîmê yew camêrdî’ ame îlankerdiş
Demîrtaşî vist vîrî ke badê weçîntayîşanê 7'ê Hezîranî prosesê înşakerdişê yew camêrdî bi koalîsyonê AKP û MHP destpa kerd. Selahattîn Demîrtaşî dîyar kerd ke rixmo ke weçîntayîşanê 16ê Nîsane de netîceyêko bê rewa vejya werte zî, ser netîceyanê fermî de ‘Rejîmê yew camêrdî’ ame îlankerdiş û wina va: “Referandûmê 16ê Nîsane de xêlê çormeyî dûştê talokeyêke pîlî de blokê ‘Nê’ de amey têhet. Ganî no pîyakarî 16ê Nîsane ra tepya zî ser prensîbanê tewr kême (esxerî) de biramo.”
‘Ganî xerîtaya rayî bîro vetiş’
Hemserokê HDP Demîrtaşî hayr ant hewcedarîya xerîtayêka rayî ser û pêşnîyazanê xo wina ard ziwan: “Çîyo ke hewce keno sifte bîro kerdiş, ganî pêrokîn temsîlkarê çormeyê civakî-sîyasî ke bin banê blokê ‘Nê’ de ca gênê, çormeyê yew mase de bîrê têhet û ser prensîban de qisey bikerê. Bado ke ser prensîban mutabaqat virazîya, seba pîyakarî û îtîfaqê bi çormeyanê civakî yê ‘Ya’ ganî xerîtayêka rayî bîro vetiş. Seba rêxistinkerdişê çormeyê ke vatî ‘Ya’ neyra tepya ganî bi ‘Blokê Demokrasî’ rayî rê bîro dewam kerdiş. Seba nayî prensîbanê esxerî yê demokratîk de pêkerdiş şertê verên o.”
Bê Kurdan nêgirotîyeno cidî
Selahattîn Demîrtaşî pêrokîn çormeyan ra waşt ke seba ameyoxê demokratîk ê Tirkîye bernameyekê hadre bikerê û hayr ant xerîtaya rayî ser. Demîrtaşî da zonayen ke bernameyêko ke seba çarekerdişê meseleya Kurd pêşnîyazê ci çinê bo, nêşkeno bîro vaten ke bernameyêke demokrasî yo û kesêk zî nêşkeno cidî bigîro û va, ‘seba çarekerdişê meseleya Kurd mekanîzmaya bingeha muzakere ganî bîro hadrekerdiş. Kamcîn aktor êşkeno senî rol kay bikero û misyon bigîro ser xo, na mekanîzma de êşkeno bîro damûsnayîş.’
Çin hesibnayîş nêbeno
Demîrtaşî aşkere kerd ke seba ke meclîs, partiyê siyasî, Birêz Ocalan û PKK mekanîzmayeke na rengî de bi tesîr bibê û va, ‘çarekerdişê meseleya Kurd de ti cidîyetê cigêyrayîşanê ke Birêz Ocalanî û PKK çin hesibnenê çin o û samîmî nîyê.’
DÎHABER/STENBOL