Bi Rayverê Şarê Kurd Abdullah Ocalanî 5'ê Nîsane 2015’î ra na het pêdîyayîş nêvirazîya û vera Îmrali tecrîd merhaleyê tewr corîn de yo. Yardimkarê Hemserokanê Pêroyî yê HDP'ê Nadîr Yildirimî da zonayen ke heta ke tecrîdo ser Ocalanî nîro wedarnayen çarekerdiş û haştî nêbeno. Yildirimî hayr ant îtîfaqê AKP û MHP ser û dîyar kerd ke no îtîfaqî ra çareserî pawitiş çiyekê şaş o.
Nadîr Yildirimî vist vîrî ke pêdîyayîşê peynî yê bi Ocalanî ke 5'ê Nîsane 2015’î de virazîya ra na het, Tirkîye de şerê xorî, krîzê ekonomî û siyasî yenê ciwîyayen û va, “Ser Ocalanî tecrîdeke teqez yeno ramiten. Têkilîya Ocalanî bi malbat, rêxistin, pawitox û şarî ra qerfnay. Na rewş damûsnena ke Ocalan tenya kesayeteke nîyo. Wexto ke têkilîya Ocalanî bi teber ra estbî, seba pêrokîn hetê civakî prosesê çarekerdişî aver şi. Ocalanî meseleyan hal kerd.”
Çareserî bi AKP nê, bê AKP beno
Yardimkarê Hemserokanê Pêroyî yê HDP'ê Nadîr Yildirimî aşkere kerd ke tecrîda ser Ocalanî yena maneya tecrîdkerdişê haştî û serbestîya Tirkîye û Rojhelatê Mîyanî û vînayîşê xo wina ard ziwan: “Eke tecrîda Îmrali bîro wedarnayen, Ocalan şert û mercanê serbest, ewle û weşîye de bîro girotiş o wext êşkîyeno behsê çarekerdişî bîro kerden. La eke wina nêbo kes nêşkeno behsê çareserî bikero. Bê Ocalan serbestî, demokrasî û haştî mumkin nîyo. Ganî seba nayî ma têkoşîna xo hera bikerê. Ti aqilê çareserî yê AKP çin o. AKP ti problemanê Tirkîye çareser nêkena, eksê nayî polîtîkaya ke probleman xorî kena, dana ramiten. Nayî ra, mordem nêşkeno bi AKP ra çareserî virazo, çareserî tenya bê AKP mimkun bena. Eke bi têkoşîn faşîzmê AKP-MHP bîro vîyarnayen, o dem êşkîyeno behsê çareserî bîro kerdiş.”
‘Nîyetê înan o çareserî çin o’
Yildirimî vatenanê “Beno ke prosesê çarekerdişî newe ra dest pêbikero” ke demê peynî de kirêşîyay rojdemî rê nêrazîbîyayîş damûsna û wina va: “Kesê ke na prosesî de nê qiseyan anê rojdem û nusenê, kesê ke daîreyê herbî de xebetyenê yê. Mîyanê nînan de tayî Kurdî zî estê. Nînan ra yewêr zî akademîsyenê Zanîngehê Dîcle Vahap Çoşkun o. Reyna Mahmut Ovur o ke serokkomarî ey zey Kurd nê, zey kokê ci Kurd biname keno. Abdulkadîr Selvî zî yew estareyanê (astare/istare) AKP ra yo. Nîyetê înan o çareserî çin o û nêşkenê bi muxatabanê sixte ra zî çiyekê winayî bikerê.”
‘Xora ma problemê hemwelatijî ciwîyenê’
Yardimkarê Hemserokanê Pêroyî yê HDP'ê Nadîr Yildirimî hayr ant vetişê 103 kesê ke mîyanê ci de Parlementerê HDP Faysal Sariyildiz û Tugba Hezer zî estê ya hemwelatijîya Tirkîye ra ser û derheqê babed de fikrê xo pare kerd: “Ma na rewşî cidî nêgênê û ganî şar zî cidî nêgîro. Bado ke rejîmê Saddam Huseyînî ame welişnayîş, dadgeh pers keno vano waştena to esta. Wexto ke vano ‘Heya ez mahkemekerdişeke adilane wazena’, dadger zî vano, ‘Meraq meke ma dê bi qanûn û destûrê ke to ronay, to mahkeme bikerê. Şima dê bivînê Erdogan zî do bi qanûnê ke veto, hemwelatijî ra vetiş yan zî nêvetişê ey do bîro qiseykerdiş. Destpêke embazanê ma ra bigîre ma pêrokînî no welatî de problemê hemwelatijî ciwîyenê. Na zihnîyet û dewlete ti wext ma zey hemwelatij nêdî. Nayî ra ma bîyê hemwelatij yan zî nêbîyê ganî cidî nîro girewtiş. Cok ra ma verê xo danê karê xo.
DÎHABER/AMED